Cydraddoldeb a Hawliau Dynol
Croeso i Amcanion Cydraddoldeb Strategol a Chynllun Gweithredu Bwrdd Iechyd Prifysgol Betsi Cadwaladr (BIPBC) ar gyfer 2024-2028. Mae’r cynllun hwn yn dangos ein hymrwymiad parhaus i hyrwyddo a chyflawni cydraddoldeb, amrywiaeth a hawliau dynol ym mhopeth a wnawn. Mae’r Bwrdd Iechyd wedi ymrwymo i sicrhau tegwch ym maes iechyd i’n defnyddwyr gwasanaeth. Rydym wedi ymrwymo i greu gweithle tecach a mwy amrywiol, lle mae amrywiaeth yn cael ei groesawu a lle mae pobl yn cael eu gwerthfawrogi. Yn ystod 2020-2024, mae’r Bwrdd Iechyd wedi wynebu’r heriau cynyddol sy’n wynebu’r GIG wrth iddo ymateb i bwysau nas gwelwyd o’r blaen ar y gwasanaeth, technolegau meddygol newydd, gweithlu sy’n newid a gwahanol faterion iechyd.
Fel Bwrdd Iechyd, byddwn yn gweithio i sicrhau bod ein rhwymedigaethau 5 statudol i gyflawni Dyletswydd Cydraddoldeb y Sector Cyhoeddus a’r Ddyletswydd Economaidd-gymdeithasol yn cael eu deall a’u cyflawni. Byddwn yn craffu ar y gwaith o weithredu ein Cynllun Cydraddoldeb Strategol, y cytunwyd arno gan ein Bwrdd Iechyd yn 2024, a byddwn yn ymdrechu i sicrhau bod ein sefydliad yn deg, yn ymatebol, yn gynhwysol ac yn hygyrch i bawb wrth i ni weithio tuag at y nod o greu Cymru decach a mwy cyfartal.
Er mwyn i newidiadau cadarnhaol ddigwydd yn ein sefydliad a’r gymdeithas ehangach, mae’r Bwrdd Iechyd yn cydnabod bod angen i ni nodi’r rhwystrau sy’n atal pobl rhag cael gafael ar ofal iechyd. Mae angen i ni fynd i’r afael â materion sy’n ymwneud â mynediad at wasanaethau, seilwaith, anfantais economaidd-gymdeithasol ac amrywiaeth ein gweithlu a’n poblogaeth. Mae angen i ni weithio mewn partneriaeth er mwyn chwalu rhwystrau i sicrhau canlyniadau cyfartal ac i gynnal hawliau pobl.
Mae’r cynllun hwn yn cydnabod y dystiolaeth a’r argymhellion yn y fframweithiau strategol fel Monitor Cydraddoldeb a Hawliau Dynol 2023: A yw Cymru'n Decach? y Comisiwn Cydraddoldeb a Hawliau Dynol. Adroddiad Drws ar Glo: Datgloi bywydau a hawliau pobl anabl yng Nghymru ar ôl COVID-19 a Chynllun Hyrwyddo Cydraddoldeb rhwng y Rhywiau yng Nghymru 2020-2023 Llywodraeth Cymru.
Mae sbardunau cenedlaethol allweddol eraill ar gyfer ein Hamcanion Cydraddoldeb yn cynnwys Cynllun Gweithredu Cymru Wrth-hiliol a Chynllun Gweithredu LHDTC+ Cymru. Rydym yn cydnabod y bydd Tasglu Anabledd Llywodraeth Cymru, o fewn cylch pedair blynedd y cynllun hwn, wedi arwain at Gynllun Anabledd Cymru. Bydd y Bwrdd Iechyd yn ymgorffori’r argymhellion a’r camau gweithredu yn ei gynlluniau, yn y Cynllun Cydraddoldeb Strategol ac 6 yn nogfennau allweddol y Bwrdd Iechyd fel y Cynllun Tymor Canolig Integredig a Chynllun Tymor Hir y Bwrdd Iechyd – Byw’n Iach, Aros yn Iach.
Mae’r Bwrdd Iechyd o’r farn bod cydraddoldeb yn ymwneud â darparu gofal wedi’i bersonoli yn seiliedig ar anghenion unigolyn. Mae’n ymwneud â thrin pawb ag urddas a pharch. Rhaid i ni gyfathrebu’n effeithiol a diwallu anghenion unigol yn gyson yn ogystal ag adolygu ein gwasanaethau’n barhaus i sicrhau eu bod yn hygyrch ac yn gynhwysol, a’u bod yn aros felly.
Hoffai’r Bwrdd Iechyd ddiolch i bawb sydd wedi rhoi o’u hamser i roi eu barn, eu syniadau a’u hadborth. Maent wedi llunio ein blaenoriaethau ar gyfer gweithredu ac wedi ffurfio sail yr Amcanion Cydraddoldeb yn ein Cynllun Gweithredu Cydraddoldeb Strategol.
Sut i gysylltu â’r Tîm Cydraddoldeb a Hawliau Dynol
I gysylltu â Thîm Cydraddoldeb BIPBC anfonwch e-bost at BCU.Equality@wales.nhs.uk neu'r Adborth gan Gleifion ac Ymwelwyr.
Fformatau gwahanol
Gellir gwneud cais i gael yr holl ddogfennau y cyfeirir atynt mewn ieithoedd neu fformatau eraill.
Ar gyfer fformatau eraill, cysylltwch â'r:
Gwasanaeth Cyngor a Chyswllt Cleifion
Ebost: BCU.PALS@wales.nhs.uk
Ffôn: 03000 851234
Sylwer efallai bod gan rai o’r dogfennau hanesyddol a gynhwysir ar y tudalennau hyn ddolenni at ddogfennau nad ydynt bellach yn weithredol. Os byddwch angen mynediad at y rhain cysylltwch â’r Tîm Cydraddoldeb.