Gwyddorau'r Gwaed

27/09/21

Fflebotomi yw'r gwasanaeth sy'n gyfrifol am gasglu samplau gwaed.

Bydd yr holl samplau gwaed ar gyfer profion labordy yn cael eu casglu gan weithiwr gofal iechyd priodol trwy eich meddyg teulu neu weithiwr proffesiynol gofal iechyd arall.

Pan gyfeirir chi, cewch eich anfon at y gwasanaeth fflebotomi priodol, lle bydd eich sampl / samplau yn cael eu cyfeirio at y labordy.

Dylai unrhyw gwestiynau ynglŷn â'ch profion gael eu cyfeirio at eich meddyg teulu neu weithiwr proffesiynol gofal iechyd.

Masgiau Wyneb

Bydd pawb sy’n dod i’r ysbyty’n cael masg wyneb sy’n gwrthsefyll hylif wrth gyrraedd.

Gwasanaethau Fflebotomi

Llinell Apwyntiadau Fflebotomi Meddygon Teulu (Amser Agor: 8:30 - 17:00 dydd Llun i ddydd Gwener).
Ffôn: 03000 850047 (opsiynau Saesneg a Chymraeg ar gael).

Paratoi Cleifion

Mae rhai profion yn gofyn am baratoi cleifion mewn ffyrdd arbennig; a rhoddir manylion gan y gweithiwyr gofal iechyd proffesiynol perthnasol yn hyn o beth. Dylai cleifion barhau i gymryd eu meddyginiaeth oni bai bod eu Meddyg yn dweud yn wahanol.
Os oes angen ymprydio rhaid i gleifion beidio â bwyta nac yfed (oni bai am ddŵr) am o leiaf 11 awr cyn cymryd eu gwaed. Yn ystod yr amser hwn ni ddylai cleifion ysmygu, cnoi gwm nac ymarfer corff. Ar ôl cymryd y sbesimen gellir ailgychwyn eich diet arferol.

27/09/21

Imiwnoleg

Mae’r gwasanaeth imiwnoleg yn arbenigo mewn ymchwilio i annormaleddau ac aflonyddwch i’r system imiwnedd.

Mae ein hadran yn cynnig ystod gynhwysfawr o ymchwiliadau i gynorthwyo clinigwyr sy'n gofalu am y cleifion hynny a chyflyrau awtoimiwnedd, rhiwmatoleg, arennol, alergaidd, anhwylderau gastroberfeddol niwrolegol a diffygion imiwnolegol.

Mae Ymchwiliadau Labordy yn cynnwys:

Clefyd awtoimiwnedd
Alergedd
Proteinau penodol
Diffyg imiwnedd

27/09/21

Biocemeg Glinigol a Haematoleg

Mae'r adran yn cynnig sbectrwm eang o brofion ar gyfer gwneud diagnosis a monitro afiechyd, ac ymateb i therapi. Bydd y rhain yn mesur lefelau cydrannau cellog, biolegol a chemegol penodol hylifau'r corff sy'n ofynnol i asesu neu fonitro swyddogaeth / camweithrediad organau.

Mae’r profion a wneir yn cynnwys profion glwcos yn y gwaed, electrolytau, ensymau, hormonau, lipidau (brasterau), sylweddau metabolaidd eraill, dadansoddi cyffuriau, cyfrif gwaed llawn, gludedd plasma, cyfradd gwaddodi erythrocyte, mononiwcleosis heintus a sgrinio Malaria. Perfformir y profion hyn gan ddefnyddio offer cwbl awtomatig a soffistigedig, sy'n gallu trin niferoedd uchel o samplau, a sicrhau fod y canlyniadau ar gael yn gyflym iawn.

27/09/21

Androleg

Mae'r adran Androleg wedi'i lleoli o fewn yr Adran Batholeg yn Ysbyty Maelor, Wrecsam. Mae'r adran yn darparu profion ar gyfer ffrwythlondeb dynion, dadansoddiad ôl-fasectomi ac ymchwiliadau alldaflu.

Derbynnir samplau trwy apwyntiad yn unig
Mae angen cwblhau ffurflen gais am brawf gan glinigydd cyn y gellir gwneud apwyntiad.

Mae ystafell glinig ar gael ar gyfer cynhyrchu sampl i gleifion sy'n byw mwy na 45 munud o amser teithio i ffwrdd o'r labordy patholeg. Mae hyn ar gael trwy apwyntiad yn unig.

Darperir gwybodaeth am gasglu a danfon samplau yn y citiau dadansoddi semen sydd ar gael gan y meddyg neu'r labordy.

Mae'r pecyn yn cynnwys:

Holiadur: rhaid i hwn gael ei lenwi wrth ddarparu’r sampl a’i gyflwyno i’r labordy gyda’r sampl.
Pot casglu sampl: RHAID defnyddio'r pot casglu sampl a ddarperir gyda'r cit - ni dderbynnir potiau casglu eraill.
Cyfarwyddiadau cynhyrchu samplau: Darllenwch y cyfarwyddiadau cynhyrchu sampl yn y pecyn pan dderbynnir y pecyn a dilynwch y cyfarwyddiadau wrth gynhyrchu'r sampl neu mae’n bosib na fydd posib ei dderbyn.

Dylai'r canlyniadau fod ar gael gan y clinigwr 14 diwrnod ar ôl derbyn y sampl.

Manylion cyswllt

Rhif ffôn: 03000 857 224 mae’r llinellau ffôn ar agor 9am-12pm, dydd Llun i ddydd Gwener
E-bost: bcu.andrologyqueries@wales.nhs.uk

27/09/21
Trallwysiadau Gwaed: Mae'r gwasanaeth Trallwyso yn darparu profion a chyflenwadau o gydrannau gwaed i gefnogi gofal clinigol cleifion. Cefnogir hyn gan dîm o Ymarferwyr Trallwyso sy'n rhoi cyngor clinigol ac yn cefnogi hyfforddiant staff clinigol.