Y diweddaraf ar frechlynnau
Diweddariadau ar ein cynlluniau brechu a chynnydd ar y brechiadau yng Ngogledd Cymru
Mehefin 13, 2025
Bydd pobl sy’n 75 mlwydd oed neu’n hŷn sydd heb gael brechlyn rhag COVID-19 yn ystod y Gwanwyn yn gallu galw heibio i un o'n canolfannau brechu i sicrhau y cânt eu hamddiffyn yn well rhag y firws o ddydd Llun 16 Mehefin
Bydd clinigau galw heibio yn cael eu cynnal am bythefnos mewn lleoliadau ledled Gogledd Cymru cyn i raglen brechu rhag COVID-19 y Gwanwyn ddod i ben ddydd Llun 30 Mehefin.
Rydym yn annog unrhyw un sy'n 75 mlwydd oed neu’n hŷn sydd wedi methu â mynychu eu hapwyntiad, wedi colli eu gwahoddiad neu heb gael eu gwahoddiad i ddod i gael eu brechu cyn diwedd y mis. Mae hyn yn cynnwys pawb yng Ngogledd Cymru a fydd yn dathlu eu pen-blwydd yn 75 oed ar neu cyn 30 Mehefin.
Gall oedolion a phlant sy’n chwe mis oed neu'n hŷn sydd â system imiwnedd wannach yn sgil cyflwr iechyd neu driniaeth feddygol hefyd ymweld â chanolfan heb apwyntiad i gael eu brechu. Mae rhagor o wybodaeth am gyflyrau a thriniaethau cymwys ar gael yma.
Mae manylion y lleoliadau sy'n cynnig brechiadau rhag COVID-19 yn ystod y Gwanwyn, a dyddiadau ac amseroedd ein clinigau, ar gael yma.
Bydd imiwnedd rhag COVID-19 yn gwanio dros dreigl amser, ac mae ymchwil yn dangos bod brechiad yn ffordd bwysig i alluogi’r bobl fwyaf agored i niwed yn ein cymunedau i sicrhau y cânt eu hamddiffyn yn well rhag y firws.
Rydym yn ddiolchgar i'r miloedd o berthnasau a ffrindiau pobl hŷn cymwys sydd wedi cynorthwyo eu hanwyliaid i gael y brechlyn rhag COVID-19 yn ystod Gwanwyn hwn.
Os oes gennych apwyntiad cyn diwedd mis Mehefin
Rydym yn annog pobl sydd wedi cael gwahoddiad drwy'r post i fynd i’w hapwyntiad ar y dyddiad a'r amser a nodir yn eu llythyr.
Darllenwch eich llythyr yn ofalus oherwydd gall lleoliad eich apwyntiad fod yn wahanol i leoliadau rhaglenni brechu blaenorol. Os na allwch fynd i’ch apwyntiad, aildrefnwch drwy ffonio ein canolfan gyswllt ar 03000 840004 neu e-bostio BCU.SROCovid19VaccinationProgramme@wales.nhs.uk.
Mae ein timau'n dal i gynnig miloedd o frechlynnau bob wythnos yn ein rhwydwaith o ganolfannau brechu cymunedol, gan gynnwys neuaddau cymunedol, meysydd chwaraeon, canolfannau hamdden a lleoliadau eraill. Rydym hefyd yn parhau i ymweld â phobl sy'n byw mewn cartrefi gofal a phobl sy'n gaeth i'w cartref i sicrhau y cânt eu hamddiffyn yn well trwy gael y brechlyn rhag COVID-19 yn ystod y Gwanwyn.
Mae oddeutu 50,000 o bobl eisoes wedi cael brechlyn rhag COVID-19 yn ystod y Gwanwyn ers i ni ddechrau cyflwyno’r rhaglen ym mis Ebrill.
Ynglŷn â’r brechlyn rhag COVID-19 yn ystod Gwanwyn
Mae’r brechlyn rhag COVID-19 yn ystod Gwanwyn yn helpu i amddiffyn pobl sy’n wynebu’r peryglon mwyaf yn sgil COVID-19 rhag dal y salwch difrifol a achosir gan y firws.
Rydym yn annog pawb sy'n gymwys i gael y brechlyn i fanteisio ar y cynnig i sicrhau y cânt eu hamddiffyn yn well rhag COVID-19 y Gwanwyn hwn. Mae rhagor o wybodaeth am y brechlyn rhag COVID-19 yn ystod y Gwanwyn ar gael yma.
Mae diweddariadau blaenorol
Mae diweddariadau blaenorol wedi'u harchifo