Gwisgo

Mae gwisgo a dadwisgo yn rhan fawr o'n bywyd o ddydd i ddydd. Gall hefyd fod yn dasg gymhleth ac mae angen i blant feistroli nifer o sgiliau i fod yn llwyddiannus. Pan fydd plant yn cael anhawster gyda sgiliau motor, cydlynu, cydbwysedd, sgiliau motor mân a dirnadaeth, efallai y byddwch yn gweld bod hyn yn effeithio ar eu gallu i wisgo eu hunain yn annibynnol.

Cyn gwisgo, meddyliwch am y sgiliau motor mân a'r sgiliau motor mawr y gallai'r plentyn fod eu hangen. Bydd darparu'r cyfleoedd i ddysgu'r sgiliau hyn yn bendant o gymorth wrth ddysgu sut mae gwisgo a dadwisgo. Gall cymryd rhan yn y gweithgareddau fod yn hwyl a gall hefyd helpu i ddatblygu'r sgiliau hanfodol e.e. cydbwysedd, sefydlogrwydd craidd, croesi llinell ganol, sgiliau dwy law a gafaeliad pinsiwrn.

Ynghyd â syniadau gweithgareddau sgiliau motor mwy cyffredinol, mae nifer o weithgareddau a fydd o gymorth i ddatblygu sgiliau gwisgo.

Syniadau cyn-gwisgo

Gwisgo gwisg ffansi - pwy sydd ddim eisiau bod yn archarwr am y dydd!
Rhoi gwisg am y ddol, y tedi neu'r tegan
Gwisgo crysau neu ffedogau mawr wrth wneud gweithgareddau coginio neu chwarae gemau a all wneud llanast
Chwarae dillad cerddorol - rhaid i'r plant wisgo cymaint o haenau ag y bo modd cyn i'r gerddoriaeth ddod i ben
Chwarae 'Simon yn Dweud' ac ymestyn ar hyd pob rhan o'r corff
Defnyddio stribed botymau, neidr botymau neu sipio a dadsipio'r drws ar babell chwarae
Gofyn i'r plentyn helpu i ddod o hyd i a pharu sanau coll pawb!

Egwyddorion Cyffredinol

Meddyliwch am safle'r plentyn, maent yn fwy tebygol o weld bod y dasg yn haws os yw'n eistedd ar y llawr neu ar gadair. Dylai hyn leihau'r angen iddo gydbwyso a'i gwneud yn haws i gyrraedd ei draed er mwyn gwisgo sanau a throwsus!
Ceisiwch gynnig cyfleoedd rheolaidd i ymarfer. Gall boreau ysgol fod yn brysur felly dechreuwch ar benwythnosau neu yn ystod gwyliau'r ysgol
Yn aml, mae'n haws dechrau gyda dadwisgo, felly gofynnwch iddo ddadwisgo cyn mynd i'r gwely. Fel arfer, mae pyjamas yn haws i'w gwisgo felly byddai hwn yn lle da i ddechrau
Meddyliwch am ble'r ydych am eistedd, y tu ôl neu o flaen y plentyn? Fel hyn byddwch yn gallu defnyddio iaith ac awgrymiadau cyson i helpu i'w arwain
Os oes drych gerllaw, anogwch y plentyn i wirio os yw wedi gwisgo'n gywir
Gosodwch ddillad y plentyn mewn trefn cyn dechrau, os ydych yn cadw'r dillad yn yr un lle, dylai'r plentyn ddysgu'n gyflym beth sydd ei angen arno i wisgo a ble i ddod o hyd i'r dillad.
Defnyddiwch ddillad llaes i ddechrau
Defnyddiwch ddillad gyda logo neu luniau ar y tu blaen a sanau gyda sawdl a bodiau lliw gwahanol
Atgoffwch y plentyn bod y label i fod ar y cefn
Efallai y bydd ambell blentyn yn dewis gwisgo ar ei ben ei hun a dangos i chi ar ôl gorffen
I'r sawl sydd angen ychydig mwy o anogaeth, ceisiwch ddefnyddio siartiau gwobrwyo neu ddefnyddio cerddoriaeth; awgrymwch eu bod yn gwisgo cyn diwedd eu hoff gân
Gallai awgrymiadau gweledol fod yn ddefnyddiol a gallwch ddod o hyd iddynt ar-lein ar wefan Do2Learn

Os yw eich plentyn yn cael anhawster gydag elfen benodol o wisgo, edrychwch ar y taflenni cyngor am gyngor ychwanegol. Mae gennych daflenni cyngor penodol ar gyfer cau dillad megis botymau a sipiau a chareiau yn ogystal â gwisgo cotiau, crysau-t a chrysau a sannau.

Mae mwy o wybodaeth ar gael am gael dillad y ffordd gywir a syniadau am drefnu a gwisgo. Peidiwch â rhoi gormod o bwysau ar y plentyn i ddechrau, mae canmoliaeth yn bwysig ac os yw eich plentyn yn mynd o gael ei wisgo gennych chi i roi cynnig arni ei hun, yna ni ddylem boeni gormod am gael pethau'n berffaith ar unwaith.

Fideos ar-lein i helpu gyda thechnegau sgiliau gwisgo:
Sgiliau dadwisgo ar gyfer plent
Dysgu plentyn sut mae gwisgo côt
Cau sip
Cau botymau
Cau careiau