Rhaglen y Pabi i helpu personoli gofal cleifion i gyn-filwyr

08/11/2022

Wrth i Ddydd y Cofio agosáu, mae Ysbyty Maelor Wrecsam wedi rhoi cynllun newydd ar waith. Bydd Rhaglen y Pabi yn ceisio adnabod cleifion o Gymuned y Lluoedd Arfog gan gynnwys personél sy'n gwasanaethu ar hyn o bryd, personél wrth gefn, cyn-filwyr a'u teuluoedd.

Yn gynharach eleni, lansiodd Bwrdd Iechyd Prifysgol Betsi Cadwaladr raglen newydd sef Rhaglen Gydweithredol Gofal Iechyd Cyn-filwyr Gogledd Cymru (NWVHC). Y bwriad yw sicrhau nad yw'r Gymuned Lluoedd Arfog o dan unrhyw anfantais o ran cael gofal a'u bod, lle bo hynny'n bosibl, yn cael gofal wedi'i bersonoli a fydd yn gwella eu canlyniadau.

Nod Rhaglen y Pabi yw gofyn i'r holl gleifion sydd yn yr ardaloedd derbyn mewn ysbytai acíwt a ydynt wedi gwasanaethu yn Lluoedd EF. Yna, cofnodir statws Lluoedd Arfog cleifion sy’n cael eu derbyn i’r ysbyty drwy osod magnet siâp pabi wrth erchwyn eu gwely. Bydd hyn yn caniatáu i dimau nyrsio drafod cyfeirio priodol at wasanaethau cymorth allanol i gyn-filwyr a sefydliadau cyn-filwyr elusennol, cyn iddynt gael eu rhyddhau.

Dywedodd Zoe Roberts, cyn-filwr yn y fyddin ac arweinydd penodedig yr NWVHC: “Un o’r prif rwystrau wrth i ni geisio cefnogi cymuned y cyn-filwyr yng ngogledd Cymru yw nad ydym ni'n gwybod pwy ydyn nhw. Bydd Rhaglen y Pabi yn rhoi darlun eglur i ni am y gyfran o’n cleifion sy'n rhan o Gymuned y Lluoedd Arfog ac sydd yn gofyn am ein gwasanaethau a'u hangen.

“Yn bwysicach fyth, bydd y rhaglen waith hon yn cynnig cyfle i sicrhau bod y Gymuned Lluoedd Arfog yn cael mynediad at wasanaethau cymorth hanfodol i gyn-filwyr pan fyddant yn gadael yr ysbyty. Bydd hefyd yn helpu staff BIPBC i gefnogi cyn-filwyr yn ôl i’w cartrefi, eu cymunedau a’r gymdeithas ehangach, gan osgoi’r angen i ddychwelyd i ysbyty ar gyfer ymyriadau clinigol pellach.”

Mae Rhaglen y Pabi wedi dechrau gyda chynllun peilot yn Uned Asesu Llawfeddygol Ysbyty Maelor Wrecsam (SAU), a thros y chwe mis nesaf bydd yn cael ei gweithredu ar draws nifer o feysydd derbyn gan gynnwys yr Uned Feddygol Acíwt (AMU) ac yna ledled yr Adran Achosion Brys yn Ysbyty Maelor Wrecsam.

I nodi dechrau'r rhaglen, gwnaeth cynrychiolwyr o'r Lleng Brydeinig Frenhinol fynd i'r SAU gan gynnwys George Rogerson, Cadeirydd Rhanbarth Gogledd Cymru ac Adran Lesley, Rheolwr Materion Cyhoeddus ac Ymgyrchoedd, a Stephen Boswell, Rheolwr Cymorth Gweithrediadau Rhanbarthol Cymru o elusen y Lluoedd Arfog, Cymdeithas y Milwyr, Morwyr, Awyrenwyr a’u Teuluoedd (SSFA).

Unwaith y bydd y rhaglen yn weithredol yn Ysbyty Maelor Wrecsam, bydd wedyn yn cael ei gweithredu yn Ysbyty Glan Clwyd ac Ysbyty Gwynedd.

Bwrdd Iechyd yn addo i gefnogi cymuned y Lluoedd Arfog ar draws Gogledd Cymru

Yn gynharach eleni llofnododd y Bwrdd Iechyd yr addewid newydd, Step into Health, sydd â’r nod o gefnogi cyfleoedd gyrfa i aelodau o Gymuned y Lluoedd Arfog drwy sefydlu cyfleoedd hyfforddi, lleoliadau gwaith, diwrnodau blasu, a chynnig cymorth wrth ymgeisio am swyddi.

Mae'r Bwrdd Iechyd eisoes wedi derbyn Gwobr Aur Cynllun Cydnabod Cyflogwyr y Llywodraeth am gynnig amrywiaeth o gymorth a thalu teyrnged i bersonél Lluoedd y gorffennol a’r presennol. Mae'n esiampl i gyflogwyr mawr eraill ac yn gyflogwyr sy'n gyfeillgar i’r lluoedd arfog.