Cefnogaeth Therapi Galwedigaethol yn helpu cleifion yn ôl ar eu traed yn Ysbyty Glan Clwyd
Mae timau arbenigol o Therapyddion Galwedigaethol yn helpu cleifion yn Ysbyty Glan Clwyd i baratoi at ddychwelyd gartref yn dilyn astudiaeth peilot sydd wedi lleihau hyd arhosiad bron i 50 y cant.
Mae'r prosiect newydd “Cartref yn Gyntaf”, sy'n helpu cleifion i ddychwelyd gartref o'r ysbyty unwaith maent wedi gorffen eu triniaeth feddygol i gleifion mewnol, wedi helpu bron i naw o bob deg claf mewnol yn yr ysbyty i adennill yr hyder a'r cryfder i ddychwelyd gartref yn ddiogel.
Yn dilyn y treial llwyddiannus, mae cefnogaeth ychwanegol Therapi Galwedigaethol wedi'i gyflwyno ar bob ward yn Ysbyty Glan Clwyd i helpu pobl ddychwelyd gartref cyn gynted â phosibl yn dilyn pwl yn yr ysbyty.
O dan y trefniadau newydd, bydd Therapyddion Galwedigaethol yn cymryd cyfrifoldeb dros arwain y broses rhyddhau cleifion gan weithio'n agos gyda nhw, eu teuluoedd, a chyd staff meddygol a gofal iechyd i sicrhau bod eu hanghenion yn cael eu bodloni.
Drwy leihau hyd arhosiad y claf yn yr ysbyty, mae gwaith y Therapyddion Galwedigaethol yn sicrhau eu bod yn cadw eu hannibyniaeth. Mae hefyd yn lleihau’r risg bod ffitrwydd, hyder a lles meddyliol yn dirywio yn ystod amser a dreulir mewn gwely ysbyty.
Mae timau arbenigol o Therapyddion Galwedigaethol yn awr yn gweithio mewn partneriaeth â wardiau, cleifion a theuluoedd i bennu beth sy'n bwysig i'r unigolyn wrth gynllunio i'w rhyddhau gartref. Os oes angen, bydd hyn yn cynnwys ymarfer gweithgareddau syml megis cerdded, ymolchi a gwisgo a pharatoi bwyd i adennill sgiliau a hyder.
Dywedodd Jennifer Davies, Therapydd Galwedigaethol a gynhaliodd y peilot cychwynnol: "Mae Cartref yn Gyntaf yn ymwneud â dynodi sut mae cleifion eisiau dychwelyd yn ôl i'w bywydau ar ôl arhosiad ysbyty, a sut gallwn ni eu helpu i gyflawni hynny.
"Drwy asesu cleifion yn gynnar, gweithio gyda nhw i osod nodau a fydd yn arwain at gael eu rhyddhau, ac arwain cyfarfodydd gofal gyda chydweithwyr ysbyty, rydym wedi gweld gwir ganlyniadau wrth helpu pobl wella unwaith maent yn feddygol iach i adael yr ysbyty.
"Drwy ymdrin â'r mater hwn, rydym yn rhyddhau adnoddau ac yn gwella llif drwy’r ysbyty."
Yn ystod y treial pum wythnos ar un o wardiau Gofal yr Henoed yr Ysbyty, bu Therapyddion Galwedigaethol yn gweithio gyda staff y ward i gefnogi cleifion sy'n feddygol barod i adael yr ysbyty, ond sydd dal angen therapi a gofal nyrsio.
Yn ystod y gwaith gwelwyd bod hyd arhosiad y cleifion a gymerodd ran wedi lleihau o 7.7 diwrnod i 4 diwrnod.
Bu i nifer y bobl sy'n cael eu rhyddhau i'w cartref ei hunain gynyddu 26 y cant, gyda 89 y cant o gleifion yn dychwelyd gartref gyda'r lefel cywir o gefnogaethyn ei le.
Lleihawyd nifer y cleifion sydd wedi'u rhestru i gael eu trosglwyddo i ysbyty cymuned yn sylweddol, ac roedd tua 192 o ddiwrnodau gwely ar gael diolch i’r broses rhyddhau gwell.
Lansiwyd y gwasanaeth Cartref yn Gyntaf sy'n cael ei ddarparu gan y timau arbenigol Therapi Galwedigaethol ddydd Llun 17 Mehefin.