Y diweddaraf ar frechlynnau
Diweddariadau ar ein cynlluniau brechu a chynnydd ar y brechiadau yng Ngogledd Cymru
Mai 20, 2025
O fewn y dyddiau nesaf, dylai fod pawb yng Ngogledd Cymru sy’n gymwys ar gyfer brechlyn COVID-19 Gwanwyn fod wedi derbyn gwahoddiad am apwyntiad
Mae mwy na 30,000 o bobl eisoes wedi rhoi hwb i’w hamddiffyniad yn erbyn y feirws ers i’r rhaglen brechiad Gwanwyn ddechrau yn Ebrill.
Fel gyda’n hymgyrchoedd brechu blaenorol, cyhoeddir apwyntiadau yn nhrefn blaenoriaeth glinigol. Caiff ein cylch terfynol o apwyntiadau ar gyfer cleifion cymwys eu postio yn y dyddiau nesaf a byddant yn cyrraedd drwy flychau post yn fuan iawn.
Mae’r brechlyn, a argymhellir gan y Cyd-bwyllgor ar Imiwneiddio a Brechu (JCVI) a Llywodraeth Cymru, yn helpu i amddiffyn pobl â risg uwch o salwch difrifol a achosir gan feirws COVID-19.
Mae pobl sy’n gymwys ar gyfer brechlyn COVID-19 Gwanwyn yn cynnwys:
- pobl hŷn oedran 75 a throsodd
- pobl sy’n byw mewn cartrefi gofal ar gyfer oedolion hŷn
- oedolion a phlant gyda system imiwnedd wannach o ganlyniad i gyflwr iechyd neu driniaeth feddygol (fel y diffinnir gan dablau 3 a 4 ym Mhennod 14a o’r Llyfr Gwyrdd)
Mae pobl sydd wedi troi’n 75 oed yn ddiweddar (neu a fydd yn cael eu pen-blwydd yn 75 oed cyn diwedd Mehefin 2025) hefyd yn gymwys, ac anfonir gwahoddiad atynt ar gyfer apwyntiad yn un o’n canolfannau brechu.
Rydym yn annog pawb sy’n gymwys ar gyfer y brechlyn i dderbyn y cynnig i gryfhau amddiffyniad eu cyrff yn erbyn COVID-19.
Dylai cleifion wirio’r manylion ar eu llythyr gwahoddiad yn ofalus, gan y gall lleoliad eu brechiad fod yn wahanol i’w hapwyntiadau blaenorol.
Gofynnwn i gleifion fynychu’r apwyntiad ar eu llythyr gwahoddiad os yw’n bosibl. Os na allwch fynychu eich apwyntiad, dilynwch y cyfarwyddiadau ar eich llythyr i’w ail drefnu.
Cynigir brechlyn COVID-19 Gwanwyn fel arfer oddeutu chwe mis (a lleiafswm o dri mis) ar ôl dyddiad brechlyn COVID-19 blaenorol y claf.
Mae ein timau’n parhau i gynnig brechlyn COVID-19 Gwanwyn i bobl sy’n gaeth i’r tŷ a’r rhai sy’n byw mewn cartrefi gofal ar gyfer oedolion hŷn, ac maent yn cysylltu â chleifion sy’n gaeth i’r tŷ a rheolwyr cartrefi gofal yn uniongyrchol i drefnu brechu.
Dylai cleifion sydd angen cymorth pellach gyda’u hapwyntiad gysylltu â’n Canolfan Gyswllt Frechu drwy alw 03000 840004 neu e-bostio BCU.SROCovid19VaccinationProgramme@wales.nhs.uk.
Mae diweddariadau blaenorol
Mae diweddariadau blaenorol wedi'u harchifo