Ffactorau ffordd o fyw y dylid eu hystyried er mwyn gwella ffrwythlondeb yn gyffredinol
Os ydych chi'n ceisio dod yn feichiog, efallai eich bod yn meddwl am eich ffrwythlondeb a pha un ai a allwch wella hynny. Efallai bod rhai ffactorau na allwch eu rheoli megis anawsterau meddygol sy'n effeithio ar y gallu i genhedlu plentyn. Gall dewisiadau ffordd o fyw effeithio ar eich ffrwythlondeb hefyd.
Gall dewis ffordd iach o fyw eich helpu i wella eich ffrwythlondeb. Dyma rywfaint o gyngor defnyddiol ynghylch iechyd i'w ystyried
Pwysau iach
Gall eich pwysau effeithio ar eich cyfle i ddod yn feichiog, a dyna pam mae cynnal pwysau iach yn bwysig. Gall pwyso gormod leihau cenhedlu naturiol, gall waethygu syndrom ofarïau polysystig (PCOS) a gall wneud i ansawdd y sberm waethygu.
Gall pwyso gormod effeithio ar driniaethau ffrwythloni:
- Bydd yn effeithio ar ganlyniad yr ofylu
- Ymateb gwael i feddyginiaethau ffrwythloni
- Bydd angen dosiau uwch o hormonau i drin ffrwythlondeb
- Bydd yn effeithio ar y gallu i ddod yn feichiog trwy ddull ffrwythloni In Vitro (IVF)
- Cyfraddau beichiogi salach
Gall colli pwysau wella canlyniadau ffrwythloni trwy helpu i gysoni'r gylchred fislifol (y mislif) a gwella'r posibilrwydd o ofylu'n naturiol. Argymhellir colli pwysau yn raddol yn hytrach na dietau cyflym. Rhagor o wybodaeth am fwyta'n iach a cholli pwysau.
Rhoi'r Gorau i Ysmygu
Gall ysmygu tybaco a chymryd sylweddau adloniant leihau'r posibilrwydd o genhedlu'n naturiol a lleihau cyfraddau llwyddiant triniaethau ffrwythloni.
- Gall ysmygu achosi anghydbwysedd o ran yr hormonau benywaidd.
- Mae tystiolaeth yn awgrymu bod ysmygu yn achosi niwed i'r tiwbiau Ffalopio
- Gall effeithio ar ansawdd sberm
- Ar ôl dod yn feichiog, bydd y tocsinau sy'n deillio o ysmygu yn cael eu trosglwyddo i'r embryo sy'n datblygu gan niweidio datblygiad y ffoetws.
- Mae ysmygu yn cynyddu'r risg o golli plentyn neu fabanod marw-anedig
Mae Helpa Fi i Stopio yn cynnig cymorth un ac un yn rhad ac am ddim gan eich cynghorydd personol ynghylch rhoi'r gorau i ysmygu.
Ffactorau ffordd o fyw i'w hystyried wrth gynllunio beichiogrwydd er mwyn gwella ffrwythlondeb
- Rhoi'r gorau i ysmygu
- Rhoi'r gorau i gymryd sylweddau adloniant
- Peidio ag yfed alcohol
- Cynnal diet cytbwys iawn
- Ystyried gwneud ymarfer corff ysgafn
- Ceisio cyngor ynghylch meddyginiaethau rhagnodedig a dros y cownter a'u heffaith ar feichiogrwydd
- Weithiau, gall ffactorau amgylcheddol beri anawsterau (yn y gweithle gan amlaf)
- Dylech fod yn ymwybodol o ffactorau straen ychwanegol a cheisio’u lleihau i'r eithaf.
Fel rhan o'n gwasanaethau ffrwythloni, byddwch yn cael cyngor ynghylch sicrhau bod eich iechyd cystal ag y gall fod. Trwy ddilyn y cyngor hwn ynghylch iechyd a ffordd o fyw, gallwch wella cyfraddau llwyddiant os bydd angen triniaethau ffrwythloni.
Gwybodaeth ddefnyddiol ac adnoddau
- Conception Tips | Fertility Network - Rhagor o wybodaeth ynghylch paratoi eich corff ac addasu eich ffordd o fyw i fwyafu eich posibilrwydd o genhedlu.
- Cynllunio eich beichiogrwydd | GIG 111 Cymru - Ewch ati i wella'r posibilrwydd o ddod yn feichiog a sicrhau beichiogrwydd iach trwy ddilyn y camau hyn.
- Trying to get pregnant | NHS - Sut i wella eich posibilrwydd o ddod yn feichiog.