Enwebu tîm sy'n cynnig annibyniaeth i bobl sydd ag anableddau dysgu ar gyfer gwobr fawreddog gan y GIG

14/10/2022

Mae tîm a lansiodd fenter newydd yn Sir y Fflint i helpu pobl sydd ag anabledd dysgu i ymdopi â'u meddyginiaeth gartref wedi cyrraedd y rhestr fer ar gyfer Gwobrau GIG Cymru 2022.

Mae'r tîm yn cynnwys staff o Fwrdd Iechyd Prifysgol Betsi Cadwaladr (BIPBC) a Chyngor Sir y Fflint yn gweithio mewn partneriaeth i gynorthwyo pobl ag anabledd dysgu, sy’n byw yn eu cartrefi eu hunain, lle bo angen i'w meddyginiaeth gael ei rhoi trwy diwb bwydo gastrostomi.

Mae'r fenter yn cynnig addysg a hyfforddiant i staff gofal roi meddyginiaeth yn ddiogel ac yn effeithiol trwy diwbiau gastrostomi. Mae hyn yn helpu pobl sydd ag anabledd dysgu a thiwb gastrostomi, i fyw'n fwy annibynnol gartref ac mae'n gosod llai o gyfyngiadau gan gynnig ansawdd bywyd gwell, ac mae'n rhoi amser i nyrsys weld mwy o gleifion.

Caiff y tîm, a gyrhaeddodd y rhestr fer yng nghategori Gwella Iechyd a Lles Gwobrau GIG Cymru, ei arwain gan Penny Bailey, Nyrs Anableddau Dysgu Cymunedol o BIPBC, sydd wedi bod yn gydlynydd allweddol o ran llwyddiant ymagwedd y tîm.

Dywedodd Penny: "Rydw i'n gweithio gydag aelodau'r tîm amlddisgyblaethol, Cyngor Sir y Fflint ac Arolygiaeth Gofal Cymru ers nifer o flynyddoedd, rydym wedi ymdrechu i fod mewn sefyllfa lle gallai staff gofal heb gofrestru roi meddyginiaeth yn ddiogel trwy gastrostomi i bobl yn eu cartrefi eu hunain, gan gynnwys y rhai sy'n awyddus i symud i'w cartref eu hunain. Yn hanesyddol, byddai nyrsys ardal yn ymweld i roi meddyginiaeth, a oedd nid yn unig yn gyfyngol i'r unigolyn a oedd yn ei derbyn ond roedd hefyd yn risg pe bai ar yr unigolyn angen meddyginiaeth ar adeg gritigol.

"Arweiniodd hyn at lansio'r fenter i ddatblygu fframwaith llywodraethu diogel i'r broses o roi meddyginiaeth gael ei dirprwyo i staff gofal a oedd eisoes yn mynd i'r cartref ac yn gofalu am agweddau eraill ar anghenion yr unigolyn.

"Trwy ddarparu addysg a hyfforddiant yn cynnwys agweddau damcaniaethol ac ymarferol, gall staff gofal sy'n gyfarwydd â'r unigolyn ddod yn gymwys ac yn hyderus i roi meddyginiaeth. Trwy natur eu rôl a rhyngweithiadau â'r unigolyn, mae staff gofal yn fwy tebygol o arsylwi ac i roi gwybod am unrhyw bryderon. Mae ymagwedd y tîm wedi helpu i sicrhau bod pobl yn gallu parhau i fod yn annibynnol yn eu cartrefi eu hunain ac mae rhoi amser yn ôl i nyrsys ymweld â mwy o gleifion."

Mae tîm BIPBC hefyd yn cynnwys Paula Edwards, Jenni Wykes a Many Kerr, Nyrsys Maeth, Zoe Scott a Mandy Lee-Evans, Nyrsys Ardal y Tu Allan i Oriau, Kate Dymond, Dietegydd, a Lisa Bradford, Nyrs Rheoli Meddyginiaethau; Nicola Wakefield, Uwch Ymarferydd Nyrsio a Cherry Reid, Nyrs Ardal.

Mae tîm Byw â Chymorth Sir y Fflint yn cynnwys Darren Rhodes, Rheolwr Tîm Gwasanaethau Cartref â Chymorth a Phreswyl Anableddau Dysgu, a Mark Holt, Rheolwr Gwasanaethau Adnoddau a Gwasanaethau Rheoleiddiedig.

Dywedodd Dirprwy Arweinydd Cyngor Sir y Fflint ac Aelod y Cabinet dros Wasanaethau Cymdeithasol a Lles, y Cynghorydd Christine Jones: "Mae'n bleser gen i weld bod y fenter ardderchog hon wedi cael ei chydnabod a'i bod wedi cyrraedd y rhestr fer ar gyfer y wobr hon. Mae Sir y Fflint yn gwbl ymrwymedig i ddarparu gwasanaethau o ansawdd ar gyfer pobl sydd ag anableddau dysgu a bydd bob amser yn gweithio gyda phartneriaid i sicrhau bod hyn yn digwydd. Mae hon yn enghraifft wych o weithio mewn partneriaeth gyda'n cydweithwyr ym maes iechyd i sicrhau bod ein trigolion yn gallu byw'n annibynnol gartref wrth dderbyn y gofal iechyd sydd ei angen arnynt."

Mae'r tîm yn rhannu canlyniadau'r fenter i hybu'r model gofal gyda'r nod o'i roi ar waith ar draws Gogledd Cymru.

Mae Bwrdd Iechyd Prifysgol Betsi Cadwaladr wedi cael ei enwebu ar gyfer pedair gwobr yng Ngwobrau GIG Cymru eleni. Mae'r cerbyd diagnostig cardioleg gymunedol hefyd wedi cyrraedd y rhestr fer am Wella Iechyd a Lles, ac am wobr 'Grymuso pobl i gydgynhyrchu eu gofal'. Mae BIPBC wedi cyrraedd y rhestr fer ar gyfer ei ap newydd i fonitro methiant y galon o bell a'i Grŵp Partneriaeth Profiad Byw o Covid Hir.