Datblygu Ysbyty Brenhinol Alexandra
23.02.2026
Ehangu Ysbyty Brenhinol Alexandra i drawsnewid gofal iechyd yn y Rhyl
Bydd Ysbyty Brenhinol Alexandra yn cael ei drawsnewid gan fuddsoddiad sylweddol o £33m gan Lywodraeth Cymru i wella gwasanaethau'r GIG i bobl y Rhyl.
Bydd y cyfleuster pwrpasol newydd yn cynnwys uned mân anafiadau a fydd yn gallu trin dros 20,000 o bobl y flwyddyn, gan leihau'r pwysau ar adran argyfwng Ysbyty Glan Clwyd gerllaw.
Bydd uned ail-alluogi gydag 14 o welyau barod-i-fynd-adref hefyd yn rhan o'r adeilad newydd. Bydd yn dod â thimau'r GIG a thimau gofal cymdeithasol at ei gilydd i ddarparu gofal i bobl sy'n dychwelyd adref ar ôl cael triniaeth feddygol a llawfeddygol yn yr ysbyty.
Bydd gwasanaethau radioleg yn cael eu hehangu yn y Rhyl, a bydd pedair ystafell ddeintyddol newydd yn gwella mynediad at ofal y GIG. Hefyd, bydd cynnydd mewn cyfleoedd hyfforddi i nyrsys deintyddol.
Mae'r adeilad newydd sy'n werth £33m, ac sydd i fod i gael ei gwblhau yn 2027, yn gam cyntaf mewn buddsoddiad o £60m yn Ysbyty Brenhinol Alexandra. Bydd achos busnes ar gyfer cam dau i ddatblygu a gwella'r ysbyty presennol yn cael ei gyflwyno ar wahân gan Fwrdd Iechyd Prifysgol Betsi Cadwaladr. Cadarnhaodd y Prif Weinidog a'r Ysgrifennydd Iechyd y cyllid ar gyfer y datblygiad newydd, cyn y cyfarfod o Gabinet Llywodraeth Cymru yn Wrecsam yn nes ymlaen heddiw (23 Chwefror).
Dywedodd y Prif Weinidog, Eluned Morgan:
"Bydd y buddsoddiad hirdymor hwn mewn gwasanaethau iechyd yn y Rhyl yn lleihau'r amser y mae pobl yn aros yn yr adran argyfwng, yn cynyddu nifer y cleifion mewnol, ac yn galluogi pobl i ddychwelyd adref yn gynt ar ôl cael triniaeth yn yr ysbyty.
"Mae'r buddsoddiad hwn yn rhan o'r camau y mae Llywodraeth Cymru yn eu cymryd i drawsnewid gwasanaethau gofal iechyd yn y Gogledd, drwy foderneiddio cyfleusterau, a gwella effeithlonrwydd er mwyn i bobl allu cael eu trin yn nes at adref."
Dywedodd Jeremy Miles, Ysgrifennydd y Cabinet dros Iechyd a Gofal Cymdeithasol:
"Mae'n bleser mawr gen i gadarnhau'r cyllid hwn i ddatblygu Ysbyty Brenhinol Alexandra. Mae'r Rhyl yn gyrchfan wyliau boblogaidd, sy'n golygu bod gwasanaethau'r GIG yn gweithio'n galed i ddiwallu anghenion trigolion lleol ac ymwelwyr drwy gydol y flwyddyn.
"Bydd y cyllid yn darparu uned newydd wych ar gyfer mân anafiadau ac anhwylderau, yn ogystal ag uned ail-alluogi newydd sy'n dod â gwasanaethau iechyd a gofal cymdeithasol at ei gilydd o dan yr un to. Bydd hynny'n helpu pobl i wella a theimlo'n hyderus eu bod yn cael y cymorth angenrheidiol i ddychwelyd adre'."
Mewn datganiad ar y cyd, dywedodd Cadeirydd Bwrdd Iechyd Prifysgol Betsi Cadwaladr, Dyfed Edwards a'r Prif Swyddog Gweithredol, Carol Shillabeer:
"Rydyn ni'n falch iawn bod Llywodraeth Cymru wedi cymeradwyo’n hachos busnes. Mae’n golygu y gallwn ni nawr symud ymlaen gyda'r gwaith paratoi a’r gwaith o adeiladu'r cyfleuster newydd pwysig hwn.
"Bydd y cyfleuster nid yn unig o fudd i'r gymuned yn y Rhyl a'r ardaloedd cyfagos, ond bydd hefyd yn darparu gwasanaethau sy’n lleihau rhai o'r pwysau ar Ysbyty Glan Clwyd. Hoffem gydnabod cefnogaeth a phartneriaeth Cyngor Sir Ddinbych a phartneriaid eraill yn y trydydd sector, ynghyd â'r gefnogaeth aruthrol a ddangoswyd gan bobl leol yn ein hymgynghoriadau.
"Bydd yr adeilad newydd hwn yn ganolbwynt i'r gymuned, ac yn arwydd o'n hymrwymiad i ddod â gwasanaethau'n agosach at gartrefi pobl sy'n byw yn y Gogledd."
Dywedodd Arweinydd Cyngor Sir Ddinbych, Jason McLellan:
"Mae'r buddsoddiad sylweddol hwn yn Ysbyty Brenhinol Alexandra yn nodi cam mawr ymlaen i iechyd a gofal cymdeithasol yn Sir Ddinbych. Mae'r ganolfan iechyd a lles fodern hon yn cynnwys gwelyau ail-alluogi ac uned mân anafiadau, a fydd yn gwella'r ddarpariaeth gofal iechyd i bobl y Rhyl a'r ardaloedd cyfagos.
"Hoffwn ddiolch i Lywodraeth Cymru a'n partneriaid am eu cydweithrediad wrth sicrhau bod y prosiect yn symud yn ei flaen. Mae hwn yn ddatblygiad pwysig i drigolion lleol, ac mae'n dangos beth y gellir ei gyflawni pan fydd partneriaid yn gweithio gyda'i gilydd i ddarparu gwasanaethau iechyd a gofal cymdeithasol cynaliadwy i'n cymunedau."
24.12.2025
Cymeradwyaeth i gynlluniau i ddatblygu Ysbyty Brenhinol Alexandra
Mae caniatâd cynllunio wedi'i roi ar gyfer cam adeiladu newydd diwygiedig Datblygiad Ysbyty Brenhinol Alexandra yn y Rhyl. Y cam olaf yn y broses yw penderfyniad ynghylch yr achos busnes llawn gan Lywodraeth Cymru.
Dywedodd Stuart Keen, cyfarwyddwr yr amgylchedd ac ystadau yn BIPBC: "Rydym yn falch iawn o fod wedi cael caniatâd cynllunio ar gyfer elfen newydd datblygiad Ysbyty Brenhinol Alexandra yn y Rhyl. Os bydd Llywodraeth Cymru yn cymeradwyo cyllid, byddwn yn gobeithio dechrau adeiladu yn 2026.
"Mae’n newyddion gwych i bobl y Rhyl a'r ardaloedd cyfagos. Rydym wedi symud gam yn nes at sicrhau gwelliannau gwerthfawr i ofal iechyd lleol, a bydd y datblygiad o fudd i'r boblogaeth leol ac yn helpu i leddfu’r pwysau ar Ysbyty Glan Clwyd."
Cynigion Diweddaraf
Cyn cyflwyno ein cais cynllunio i Gyngor Sir Ddinbych, rydym eisiau clywed eich barn ar y cynigion dylunio drafft newydd. Yn dilyn y cyfnod ymgynghori pedair wythnos hwn, cyflwynir cais cynllunio newydd.
Mae’r adeilad newydd sy’n cael i gynnig yn cynrychioli buddsoddiad sylweddol i safle Ysbyty Brenhinol Alexandra. Byddai’n darparu cyfleusterau newydd a modern gan wasanaethu pobl Y Rhyl a’i ardaloedd cyfagos.
Yn ôl ein cynlluniau drafft, byddai adeilad newydd yr ysbyty yn cael ei osod ar ran ddeheuol safle'r ysbyty. Mae hyn wrth ymyl Ffordd Russell ac yn cael ei ddefnyddio fel maes parcio ar hyn o bryd. Byddai'r brif fynedfa i gerbydau i'r safle yn parhau ar Ffordd Alexandra.
Byddai’r adeilad newydd yn darparu:
- Gwelyâu ward ysbyty newydd;
- Uned Mân Anafiadau ac Anhwylderau (MIAU) newydd;
- Uned ddeintyddol newydd;
- Darpariaeth ar gyfer gwasanaethau cymorth eraill o fewn yr adeilad a
- Gwell cyfleusterau modern ar gyfer cleifion, eu teuluoedd a staff.
Yn ogystal â cheisio caniatâd, rydym yn datblygu achos busnes llawn i gyfiawnhau'r costau dan sylw a dangos sut y byddem yn talu am nwyddau a gwasanaethau. Bydd angen i hyn gael ei gymeradwyo gan gyfarfod o'r Bwrdd Iechyd. Bydd hefyd angen cymeradwyaeth ariannu Llywodraeth Cymru. Os rhoddir yr holl gymeradwyaethau, rydym yn gobeithio dechrau’r gwaith adeiladu yn chwarter cyntaf 2026.
Mae rhaglen o waith adnewyddu a gwella i brif adeilad presennol Ysbyty Brenhinol Alexandra hefyd wedi'i chynllunio i fynd yn ei blaen, ar wahân i'r cynigion adeiladu newydd hyn.
Cysylltwch
Cyn cyflwyno ein cynlluniau i Gyngor Sir Ddinbych, rydym eisiau i chi rannu eich barn ar y cynlluniau diwygiedig hyn gyda ni.
Er mwyn sicrhau Hygyrchedd - os oes angen y dogfennau hyn arnoch mewn fformatau eraill, cysylltwch â: consultationpagesuk@tetratech.com
Gallwch ddarllen y dogfennau drafft gan ddefnyddio’r dolenni isod:
Hysbysiadau
Lluniadau a Gwybodaeth Ddylunio
Dogfennau Ategol Eraill
Os hoffech roi sylwadau ar y cynigion, gallwch wneud hynny ar-lein trwy gwblhau’r arolwg gan ddefnyddio’r ddolen ganlynol:
Y dyddiad cau ar gyfer ymatebion yw 12 Medi, 2025.
Fel arall, gellir rhoi sylwadau trwy anfon e-bost at dîm y prosiect ar: consultationpagesuk@tetratech.com