Clinig cyflym PrEP – gwybodaeth i gleifion
Mae'r clinig Cyflym PrEP yn cynnig gwiriad iechyd rhywiol cyflym, cyfrinachol am ddim i'r rhai nad oes ganddynt unrhyw symptomau (sydd heb sylwi ar unrhyw beth o'i le) ac i gasglu PrEP.
Beth yw Clinig Cyflym PrEP?
- Gwasanaeth cyflym sy'n cael ei redeg gan Weithwyr Cymorth Gofal Iechyd
- Ni fyddwch yn gweld meddyg na nyrs
- Nid ydym yn gofyn unrhyw gwestiynau manwl i chi
- Byddwch chi’n rhoi sampl wrin ac yn cymryd swabiau
- Rydym yn cymryd sampl gwaed (o'ch braich)
PEIDIWCH Â PHASIO WRIN AM O LEIAF AWR CYN I CHI GAEL EICH PROFI
Pa heintiau sy'n cael eu profi?
- Rydym yn profi ar gyfer Chlamydia a Gonorea (wrin, swabiau), Syffilis a HIV a Hepatitis C a gweithrediad yr arennau unwaith y flwyddyn (gwaed)
Ydych chi'n poeni am gyswllt rhywiol penodol neu risg yr ydych wedi'i gymryd yn ddiweddar?
Mae bwlch amser (a elwir yn ffenestr) rhwng dal haint a phan mae’n ymddangos mewn profion. Gall profi'n rhy gynnar olygu nad yw haint yn cael ei ganfod. Byddem yn argymell y bylchau amser canlynol rhwng y cyswllt rhyw diwethaf a gwneud y profion:
- Chlamydia a Gonorea – pythefnos
- HIV a Syffilis (prawf gwaed) – 4 wythnos
Os ydych o fewn cyfnod y ffenestr, efallai y cewch y profion heddiw ond rydym yn argymell eich bod yn dychwelyd ar gyfer profi eto
A yw’r clinig cyflym PrEP yn addas i fi?
NID yw’r clinig cyflym yn addas ar eich cyfer os ydych:
- dan 18 oed
- rydych wedi dioddef ymosodiad rhywiol neu'n meddwl y gallech fod wedi dioddef ymosodiad rhywiol o fewn y 7 diwrnod diwethaf
- heb fod yn cymryd PrEP yn rheolaidd ac wedi dod i gysylltiad â HIV o fewn y 72 awr ddiwethaf
- os oes gennych unrhyw symptomau
Ymhlith y symptomau posibl mae: poen wrth basio wrin, rhedlif o'r pidyn neu'r pen ôl, poen neu chwydd yn y ceilliau, rhedlif anarferol o'r wain, lympiau, chwyddiadau, pothelli ar yr organau cenhedlu.
Dim ond cwestiynau sylfaenol y gall y gweithwyr cymorth gofal iechyd eu hateb ac mae’r wybodaeth y gallant roi i chi yn gyfyngedig. Os oes gennych unrhyw gwestiynau neu bryderon penodol na all y gweithwyr cymorth gofal iechyd eu hateb, rydym yn eich cynghori i drefnu apwyntiad i weld nyrs neu feddyg.
Canlyniadau
- Mae canlyniadau ar gael fel arfer o fewn 14 diwrnod a byddant yn cael eu hanfon drwy neges destun i'ch ffôn symudol. Gwnewch yn siŵr bod eich rhif ffôn symudol wedi'i gofnodi'n gywir a'ch bod yn llofnodi'r ffurflen ganiatâd i dderbyn negeseuon testun.
Os bydd unrhyw ganlyniadau positif o’ch profion byddwch yn derbyn neges destun yn gofyn i chi ein ffonio fel y gallwn drafod eich canlyniadau a threfnu triniaeth.