Gwasanaeth rheoli pwysau amlddisgyblaethol arbenigol
Mae'r tîm rheoli pwysau amlddisgyblaethol arbenigol yn cynnwys Meddyg Ymgynghorol, Deietegydd, Seicolegydd, Therapydd Galwedigaethol, Gweithiwr Ymarfer Corff Proffesiynol a Chynorthwyydd Therapi.
Gall tîm 'Cymorth gyda'm Pwysau' ystyried cyfeirio at y tîm amlddisgyblaethol arbenigol ar gyfer pobl sy'n bodloni'r meini prawf canlynol:
- Wedi cwblhau rhaglen KindEating, sydd wedi gwneud newidiadau i arferion bwyta a gweithgarwch corfforol a lle bo angen cymorth penodol pellach ar gyfer materion mwy cymhleth
- BMI dros 45kg/m2
- Wedi cael eu cyfeirio at 'Cymorth gyda'm Pwysau' gan weithiwr gofal iechyd proffesiynol
- Yn gallu mynychu apwyntiadau wyneb yn wyneb rheolaidd yn ystod oriau gwaith
- Yn barod i ymrwymo i o leiaf rhaglen bellach o chwe mis. Mae hyn yn cynnwys cryn dipyn o ymrwymiad i newidiadau pellach i ymddygiad.
Sylwch fod angen i weithiwr gofal iechyd proffesiynol gyfeirio cleifion sydd â BMI o dros 45kg/m2 er mwyn sicrhau bod gennym y wybodaeth angenrheidiol i ddarparu'r cymorth priodol.
Yn dilyn asesiad, bydd y tîm amlddisgyblaethol yn cynnig rhaglen unigol yn ôl eich anghenion chi. Gallai hyn gynnwys:
- Gweithio gyda Deietegydd i newid patrymau bwyta
- Therapi seicolegol
- Gweithio gyda Therapydd Galwedigaethol i oresgyn rhwystrau at golli pwysau neu i wella lles
- Cymryd rhan mewn grŵp i fynd i'r afael â bwyta emosiynol/gorfwyta.
- Gweithio gyda Gweithiwr Ymarfer Corff Proffesiynol i wella gweithgarwch.
- Apwyntiad gyda'r Meddyg Ymgynghorol, i asesu eich iechyd metabolig ac i gynnig triniaeth, os bydd angen.
Gall y tîm ystyried cyfeirio ymlaen ar gyfer llawdriniaeth colli pwysau (bariatrig) os yw'n briodol. Ar gyfer cyfeiriad o'r fath, mae angen i unigolion ddangos cyfnod ymgysylltu gyda'r gwasanaeth arbenigol ac i ddangos eu bod yn barod ar lefel seicolegol a chorfforol i gael llawdriniaeth colli pwysau. Ar hyn o bryd, mae arhosiad hirfaith am lawdriniaeth, sy'n fwy na dwy flynedd.