Llunio Dyfodol Ysbyty Cymunedol Tywyn
Mae ward y cleifion mewnol yn Ysbyty Tywyn wedi bod ar gau dros dro ers Ebrill 2023 oherwydd heriau parhaus yn ymwneud â staffio'r gwasanaeth yn ddiogel. Er bod rhywfaint o gynnydd wedi'i wneud gydag ymdrechion recriwtio, nid ydym wedi bod â digon o staff sydd â'r sgiliau cywir, na digon o staff yn aros gyda ni, er mwyn cynnal y ward yn ddiogel.
Yn y cyfamser, mae'r Bwrdd Iechyd wedi gweithio gyda phartneriaid lleol i atgyfnerthu gwasanaethau amgen ac i'w hehangu. Mae hyn yn cynnwys gwelyau ychwanegol i gleifion mewnol yn Nolgellau, lansio gwasanaeth cymunedol Tuag Adref, ailagor yr Uned Mân Anafiadau, a datblygu Ystafell Driniaeth a Hwb Lles newydd yn Ysbyty Tywyn.
Rydym bellach yn dechrau ar y cam nesaf o ymgysylltu â'r gymuned leol. Rydym yn awyddus i weithio'n agos gyda thrigolion, staff, a phartneriaid i lunio dyfodol gwasanaethau yn Nhywyn - gan gynnwys adolygu'r heriau, gwrando ar yr hyn sydd bwysicaf, ac ystyried senarios amrywiol i gynnig gofal sy'n ddiogel, o ansawdd uchel ac yn gynaliadwy.
Ar ôl casglu adborth gan y gymuned, bydd y Bwrdd Iechyd yn datblygu opsiynau a'i nod yw gwneud penderfyniad yn ystod cyfarfod cyhoeddus y Bwrdd ym mis Rhagfyr 2025.
Yr Hyn yr ydym wedi'i Glywed hyd Yma
Mae cannoedd o bobl wedi rhannu eu barn gyda ni eisoes trwy'r arolwg cychwynnol. Mae'r adborth hwn yn cael ei ddefnyddio er mwyn helpu i lunio cam nesaf y gwaith - mae sicrhau ein bod wedi clywed yn uniongyrchol gan y gymuned yn sail i sut y byddwn yn symud ymlaen.
Sut y Gallwch chi Gymryd Rhan
Rydym bellach yn dechrau cyfarfod â grwpiau a sefydliadau cymunedol sydd wedi'n gwahodd i ddod i glywed eu barn, a byddwn yn parhau i estyn allan dros yr wythnosau sydd i ddod.
Rydym hefyd yn arbennig o awyddus i glywed gan unrhyw un sydd â phrofiad uniongyrchol o wasanaethau yn Ysbyty Tywyn - yn benodol y rhai sydd wedi defnyddio Ward Dyfi neu sydd wedi cefnogi rhywun yno. Mae'ch straeon a'ch profiadau yn hynod werthfawr o ran ein helpu i ddeall yr hyn sydd wedi gweithio'n dda, beth mae angen i ni ei wella, a'r hyn y mae pobl yn awyddus i'w gael yn y dyfodol.
Megis dechrau yw hyn. Bydd mwy o gyfleoedd i ddweud eich dweud wrth i'r gwaith symud yn ei flaen. Rydym am i hon fod yn sgwrs barhaus.
Dweud eich Dweud
I ategu'r cam hwn, rydym yn gwahodd pobl leol, staff, a grwpiau sydd â diddordeb i gymryd rhan mewn arolwg byr. Bydd eich adborth yn helpu i lywio'r ystyriaethau cynnar a bydd yn sail i ddatblygu opsiynau cyn i unrhyw benderfyniadau gael eu gwneud.
Caiff yr holl ymatebion i'r arolwg, nodiadau cyfarfod, a straeon personol eu hadolygu'n ofalus a byddant yn sail i'r cynigion y mae'r Bwrdd Iechyd yn eu datblygu
Cwblhewch yr arolwg: Arolwg Tywyn
Rhannwch eich stori: Os ydych wedi defnyddio Ward Dyfi neu wedi cefnogi rhywun yno, byddem yn falch iawn o glywed gennych. Cysylltwch â ni ar BCU.GetInvolved@wales.nhs.uk fel y gallwn gofnodi eich profiad byw.
Cysylltu â ni: Os hoffech glywed mwy a derbyn diweddariadau uniongyrchol wrth i'r gwaith hwn symud yn ei flaen, rhowch wybod i ni. Byddem yn fwy na pharod i roi diweddariadau cyson i chi ac i rannu cyfleoedd pellach i chi gymryd rhan. Tanysgrifiwch i e-newyddlen y Bwrdd Iechyd yma.
Byddwn yn cyhoeddi crynodeb o'r hyn y mae'r gymuned yn ei ddweud wrthym ac yn esbonio sut mae hynny'n dylanwadu ar ein cynlluniau ni. Bydd eich cyfraniad chi'n ganolog i'r opsiynau a gaiff eu cyflwyno i'r Bwrdd. Byddwn yn rhoi diweddariadau cyson i chi drwy'r cyfan - gan gynnwys rhannu'r penderfyniad terfynol a'r rhesymau sydd ynghlwm wrtho. Fel hyn, byddwch yn gweld yn glir sut mae'ch llais wedi dylanwadu ar y canlyniad.
Diolch am ein helpu i lunio dyfodol gofal yn Nhywyn.