Lleisiau Mamolaeth a Newyddenedigol
Mae Lleisiau Mamolaeth a Newyddenedigol yn dod â merched a’u partneriaid/teuluoedd sydd â phrofiad diweddar o wasanaethau mamolaeth, a’r rhai sydd â diddordeb mewn gwella gwasanaethau mamolaeth, ynghyd gyda gweithwyr proffesiynol iechyd sy’n gweithio mewn gwasanaethau mamolaeth ar draws y Bwrdd Iechyd.
Rydym yn gwrando ar ein haelodau ac yn cyfrannu at ddatblygiad a darpariaeth gwasanaethau o safon i fodloni anghenion ein cymuned trwy sicrhau bod merched a’u teuluoedd wrth wraidd popeth a wnawn.
Trwy ymuno â’n grŵp, bydd gennych y cyfle i rannu eich profiadau, eich mewnwelediadau a’ch syniadau gyda ni. Byddwch yn rhan o ymdrech gydweithredol i ddynodi a mynd i’r afael â heriau, dathlu llwyddiannau ac ysgogi gwelliannau yn y gwasanaethau mamolaeth.
Os oes diddordeb gennych mewn dod yn rhan o grŵp Lleisiau Mamolaeth a Newyddenedigol, yn ddefnyddiwr gwasanaeth neu’n rhanddeiliad arall, cysylltwch â BCU.MaternityVoices@wales.nhs.uk
Ymunwch â’n grŵp Facebook Lleisiau Mamolaeth i ymuno â’r sgyrsiau ar y cyfryngau cymdeithasol.
Yr hyn yr ydym yn ei wneud
Rydym yn cwrdd yn rheolaidd i sicrhau bod safbwyntiau merched, partneriaid a theuluoedd yn cael eu clywed. Mae’r sesiynau’n cael eu cynnal ar-lein, ond rydym yn rhoi gwybod i aelodau os oes cyfle i gwrdd wyneb yn wyneb.
Mae’r grŵp yn cynnwys:
- Defnyddwyr diweddar neu gyfredol gwasanaethau mamolaeth yng Ngogledd Cymru
- Gweithwyr Gofal Iechyd Proffesiynol gan gynnwys bydwragedd, meddygon, bydwragedd arbenigol ac ymwelwyr iechyd
- Cynrychiolwyr o grwpiau gwirfoddol / elusennol / cymorth lleol ar draws Gogledd Cymru megis bwydo ar y fron ac iechyd meddwl.
Rydym yn gwerthfawrogi bod bob aelod yn dod â set gwahanol o brofiadau, sgiliau a safbwyntiau unigryw sy’n cyfrannu at gryfder y grŵp.
Y tu allan i’n cyfarfodydd, rydym yn rhoi’r cyfle i aelodau wneud sylwadau ar ddiweddariadau i bolisïau, canllawiau a blaenoriaethau lleol a arweinir yn genedlaethol – mae gohebiaeth yn cael ei anfon yn bennaf trwy e-bost neu ein grŵp Facebook i alluogi mynediad a chyfle ar gyfer ystyriaeth ar adeg sy’n gyfleus i’n haelodau.
Rhannu eich profiad
Os oes gennych brofiad diweddar gyda gwasanaethau mamolaeth yng Ngogledd Cymru ac os hoffech rannu eich profiad, cwblhewch y ffurflen adborth ar-lein hon.
P’un a yw eich profiad gyda’r gwasanaethau mamolaeth yng Ngogledd Cymru wedi bod yn un cadarnhaol neu os oes gennych bryderon, rydym yn croesawu eich adborth trwy’r Gwasanaeth Cyngor a Chyswllt Cleifion (PALS). Mae eich mewnbwn yn ein helpu i wella ein gwasanaethau a sicrhau ein bod yn parhau i ddarparu’r gofal gorau posibl.
Gallwch rannu eich meddyliau neu gallwch godi unrhyw broblemau gyda PALS yn uniongyrchol, neu os yw’n fwy cyfleus, gallwch gyflwyno eich adborth trwy ein ffurflen ar-lein. Gallwch ddod o hyd i fwy o wybodaeth, gan gynnwys sut i gysylltu â’n tîm PALS, yma.
Myfyrio ar Enedigaeth
Mae Myfyrio ar Enedigaeth yn wasanaeth gwrando a gydlynir gan ein tîm o oruchwylwyr clinigol ar gyfer bydwragedd. Mae ar gael i ferched sydd wedi rhoi genedigaeth, a’u partneriaid, yng Ngogledd Cymru, ac mae’n cynnig y cyfle i rannu a myfyrio ar eich profiad o wasanaethau mamolaeth.
Bydd ein tîm ymroddedig yn cymryd amser i wrando ac yn helpu i ateb unrhyw gwestiynau a allai fod gennych. I drefnu apwyntiad, gallwch e-bostio’r tîm isod gyda’ch manylion cyswllt, eich rhif ysbyty neu eich dyddiad geni, lle rhoddoch enedigaeth a'r dyddiad geni. Yna, bydd un o'n tîm yn cysylltu â chi i wneud apwyntiad.
I gael mynediad at y gwasanaeth, gallwch e-bostio: BCU.BirthReflections@wales.nhs.uk
Os ydych chi'n teimlo'ch bod wedi'ch trawmateiddio neu wedi'ch effeithio'n ddwfn gan eich genedigaeth, rydym yn eich cynghori i gysylltu â'ch Meddyg Teulu yn y lle cyntaf i sicrhau eich bod yn cael y cymorth cywir.