'Maen nhw wedi fy helpu i ddysgu cerdded a siarad eto': Canolfan adsefydlu strôc newydd yn agor yn Llandudno
Mae canolfan adsefydlu strôc newydd wedi agor yn Ysbyty Cyffredinol Llandudno er mwyn sicrhau bod cleifion yn cael y siawns orau o adferiad da ar ôl cael strôc.
Un o'r cleifion cyntaf yn y ganolfan adsefydlu yw Ann Ellis, 78 o Fagillt. Cafodd Ann strôc ar Noswyl Nadolig a chafodd ei chludo i Ysbyty Glan Clwyd ac yna ei throsglwyddo i Landudno dair wythnos yn ddiweddarach.
Pan gyrhaeddodd Ann am y tro cyntaf roedd yn ei chael yn anodd siarad, cerdded a symud ei braich dde, ond diolch i gefnogaeth ystod lawn o staff arbenigol amlddisgyblaethol gan gynnwys Ffisiotherapyddion, Nyrsys, Meddygon, Seicolegwyr, Therapyddion Iaith a Lleferydd a Therapyddion Galwedigaethol, gall Ann gyfathrebu unwaith eto ac mae'n dysgu cerdded gyda chymorth.
Dywedodd Ann: “Pan gyrhaeddais i yma am y tro cyntaf, doeddwn i ddim yn gallu siarad, rydw i'n dal i ddrysu ychydig, ond rydw i'n gwella bob dydd. Rydw i wedi bod yn gweld yr holl therapyddion bob dydd. Yn y ganolfan adsefydlu rydym yn cael llawer mwy o amser gyda'r therapyddion, maen nhw'n dda iawn.
“Rwy’n dysgu cerdded ar y bariau hefyd, rwy’n benderfynol, mae’n rhaid i chi fod, mae’r therapyddion yn fy nghadw i’n brysur ac yn fy nghadw i fynd.”
Mae perthnasau Ann, ei merch Caroline Pritchard a’i chwaer Sue Toplass, hefyd wedi canmol y staff gan ddweud, “maen nhw wedi bod yn wych, gallwn fynd adref ar ôl ymweld heb orfod poeni oherwydd mae’r staff mor hyfryd, ac rydym yn gwybod ei bod yn cael gofal da”.
Anogir cleifion i gymryd rhan mewn gweithgareddau ac ymarferion sydd wedi'u cynllunio i hybu adferiad ac annibyniaeth, gan gynnwys tasgau hunanofal dyddiol, cerdded a chyfathrebu a thasgau gwybyddol - mae'n hysbys bod pob un o'r rhain yn cynyddu'r siawns o wella ar ôl strôc.
Dywedodd Therapydd Ymgynghorol Strôc, Dr Sushmita Mohapatra: “Rwy’n falch iawn o weld y ganolfan adsefydlu strôc ar agor i’n cleifion er mwyn helpu i hybu eu hadferiad.
“Mae’n hyfryd clywed geiriau caredig Ann am yr holl staff a pha mor dda y mae ei thriniaeth yn mynd gyda therapi amlddisgyblaethol.
“Mae hon yn fenter wych yng Ngogledd Cymru i fuddsoddi yn y llwybr strôc newydd. Bydd yr uned strôc newydd yn darparu gofal adsefydlu dwys â ffocws sy’n seiliedig ar dystiolaeth, sy’n canolbwyntio ar y claf ac yn canolbwyntio ar nodau, yn unol â safonau strôc Cenedlaethol. Bydd hyn yn helpu i wneud y mwyaf o botensial a phosibiliadau claf i ennill annibyniaeth yn eu gweithgareddau gwerthfawr a’u rolau bywyd.”
Dyma’r ail o dair canolfan adsefydlu cleifion mewnol cymunedol arbenigol newydd i agor yng Ngogledd Cymru ar gyfer cleifion nad oes angen triniaeth strôc arbenigol arnynt bellach mewn ysbyty acíwt, ond sydd yn parhau i fod angen gofal adsefydlu strôc o hyd na ellir ei ddarparu gartref.
Agorodd y ganolfan gyntaf yn Ysbyty Eryri yng Ngwynedd y llynedd, a bydd y drydedd ganolfan yn agor yn fuan yn Ysbyty Cymunedol Glannau Dyfrdwy.
Uned adsefydlu strôc newydd yn agor i gleifion Ysbyty Eryri yng Nghaernarfon
Mae'r ganolfan adsefydlu strôc yn rhan o Raglen Gwella Gwasanaethau Strôc Bwrdd Iechyd Prifysgol Betsi Cadwaladr sydd hefyd yn cynnwys gwasanaeth ataliol newydd, lle bydd arbenigwyr yn gweithio gyda meddygon teulu i sgrinio cleifion a allai fod yn dangos arwyddion y gallent gael strôc yn y dyfodol, a gwasanaeth Rhyddhau'n Gynnar â Chymorth a fydd yn helpu rhai cleifion i wella gartref, yn hytrach nag yn yr ysbyty neu leoliad clinigol.