Ebrill 11, 2024

Mae arweinwyr y Bwrdd Iechyd wedi diolch i Brifysgol Wrecsam am ei rôl ganolog yn y gwaith o amddiffyn rhag COVID-19 wrth i ganolfan frechu newydd agor yn y ddinas.

Bydd clinig brechu pwrpasol yn agor yn adeilad Plas Gororau, Bwrdd Iechyd Prifysgol Betsi Cadwaladr ym Mharc Technoleg Wrecsam yr wythnos nesaf, gan gymryd lle Canolfan Catrin Finch y brifysgol wedi mwy na thair blynedd.

Cafodd lleoliad y cyfarfodydd, y cynadleddau a'r digwyddiadau ei ail-bwrpasu fel safle brechu torfol ym mis Ionawr 2021, wrth i’r ymgyrch frechu rhag COVID-19 gynyddu ar draws y wlad. Mae cyfanswm o 193,176 o frechlynnau COVID-19 a brechlynnau atgyfnerthu rhag COVID-19 wedi'u rhoi yng Nghanolfan Catrin Finch.

Cynhaliwyd y clinig brechu am y tro olaf yn y ganolfan ychydig cyn y Pasg. O ddydd Llun ymlaen, bydd pob apwyntiad ar gyfer brechlynnau atgyfnerthu rhag COVID-19 yn Wrecsam yn cael eu cynnal ym Mhlas Gororau.

Dywedodd Carol Shillabeer, Prif Weithredwr Betsi Cadwaladr fod y rhaglen frechu yng Ngogledd Cymru wedi bod yn “ymrwymiad rhyfeddol” – diolch, yn rhannol, i gefnogaeth gan bartneriaid fel y brifysgol.

“Mae lefelau uchel o frechiadau rhag COVID-19 wedi helpu i leihau achosion o salwch difrifol, lleihau derbyniadau i’r ysbyty, ac amddiffyn pobl Gogledd Cymru a gwasanaethau’r GIG y maent wedi dibynnu arnynt yn ystod y pandemig,” meddai Carol.

“Dim ond gyda chefnogaeth ein partneriaid niferus, gan gynnwys Prifysgol Wrecsam, y gallai’r rhaglen hon fod wedi bod mor llwyddiannus. Fel ein prif ganolfan frechu ar gyfer Wrecsam, mae Canolfan Catrin Finch wedi croesawu degau o filoedd o drigolion lleol o bob oed.

“Diolchwn i’n cydweithwyr yn y brifysgol am eu hamynedd, eu proffesiynoldeb a’u hymrwymiad, sydd wedi ein cynorthwyo i gynnig yr amddiffyniad a’r gwasanaeth gorau posibl i bobl Gogledd Cymru.”

Dywedodd yr Athro Maria Hinfelaar, yr Is-ganghellor, ei bod yn falch bod Prifysgol Wrecsam wedi gallu gwasanaethu'r gymuned ehangach drwy chwarae rhan werthfawr wrth fynd i'r afael â phandemig COVID-19.

“Mae gweld faint o ddegau o filoedd o bobl sydd wedi bod trwy ddrysau canolfan frechu Catrin Finch a sut mae’r ganolfan wedi cyfrannu at y lefelau niferus sy’n manteisio ar y brechiadau yn ein hardal yn syfrdanol,” meddai.

Yn ogystal, cynhaliodd y brifysgol ganolfan frechu dorfol ar gyfer Gogledd Sir Ddinbych a’r cyffiniau yng Nghanolfan Dechnoleg OpTIC yn Llanelwy rhwng Medi 2021 a Chwefror 2023.

Rhoddwyd cyfanswm o 87,526 o frechiadau yn yr OpTIC, sydd hefyd wedi cyflenwi fel hwb i’r staff sy’n gweithio ar y rhaglen frechu.

Eich brechlyn atgyfnerthu rhag COVID-19 ar gyfer y Gwanwyn

Mae apwyntiadau ar gyfer brechlynnau atgyfnerthu'r Gwanwyn ar gyfer grwpiau cymwys yn dechrau wythnos nesaf a byddant yn cael eu cynnig trwy gydol mis Mai a mis Mehefin.

Bydd pobl sy'n cael eu gwahodd am y brechiadau cyntaf yn y ganolfan newydd wedi derbyn llythyrau gyda dyddiad ac amser eu hapwyntiadau eisoes. Bydd sypiau eraill o wahoddiadau’n cael eu dosbarthu yn nhrefn blaenoriaeth dros yr wythnosau nesaf.

Gallwch wirio a ydych yn gymwys ar gyfer brechiad atgyfnerthu rhag COVID-19 y Gwanwyn a chanfod rhagor o fanylion am y brechiad ar wefan y bwrdd iechyd.

Cofrestrwch i gael ein newyddion diweddaraf

🔵 Cewch y newyddion diweddaraf gan Fwrdd Iechyd Prifysgol Betsi Cadwaladr drwy gofrestru ar ein rhestr bostio.