Y Bwrdd Iechyd yn ennill gwobr tîm rheoli risg y flwyddyn yng ngwobrau mawreddog CIR

Rydym wedi cael ein cydnabod yng Ngwobrau Rheoli Risg CIR 2025. Cawsom ein henwebu mewn pum categori cenedlaethol ac fe enillon ni wobr Tîm Rheoli Risg y Flwyddyn.

Bu Nesta Collingridge, Pennaeth Rheoli Risg, yn y seremoni yn Llundain ddydd Gwener i dderbyn y wobr ar ran y sefydliad.

Mae Gwobrau CIR yn un o'r digwyddiadau rheoli risg traws-sector mwyaf uchel eu parch yn y DU. Roedd enillwyr eleni yn cynnwys sefydliadau byd-eang mawr fel Saudi Aramco, EDF Energy – Hinkley Point C, Aviva, KAEA (Jet Decommissioning), Rolls-Royce, Banc Monzo, a Chymdeithas Adeiladu Nationwide. BIPBC oedd yr unig sefydliad gofal iechyd a gydnabuwyd ymhlith y sectorau hyn. Mae'r wobr felly yn arbennig o arwyddocaol, ac yn adlewyrchu ymrwymiad y Bwrdd i atgyfnerthu llywodraethu, sicrwydd a rheoli risg yn y sefydliad.

Mae ennill Tîm Rheoli Risg y Flwyddyn yn cydnabod effeithiolrwydd y tîm wrth atgyfnerthu gwydnwch sefydliadol, a gwneud penderfyniadau gwybodus.

Wrth drafod y wobr, dywedodd Nesta: “Yn gyntaf, mae’r wobr hon i Huw Williams, Jody Evans, Linda Dyson, ein Rheolwyr Risg Rhanbarthol; Danielle Hunt ac Anthony Hughes Rheolwyr Sicrwydd Risg. Mae'n cydnabod eich ymrwymiad i gryfhau ein seilwaith risg, yr oriau di-rif o gyngor, a'r gefnogaeth rydych chi wedi'i rhoi i'n gwasanaethau.

“Diolch yn fawr hefyd i Pam Wenger, ein Cyfarwyddwr Llywodraethu Corfforaethol, a’n Prif Weithredwr, Carol Shillabeer, am eu harweinyddiaeth, eu cefnogaeth a’u harweiniad drwy gydol y newid hwn. Ac i aelodau ein Bwrdd — diolch i chi gyd am yr holl gefnogaeth ac amynedd yn ystod y trawsnewidiad.

“Ond yn fwy na dim, mae’r wobr hon i'r 500 o arweinwyr a rheolwyr risg ar draws y sefydliad - y rhai ohonoch sydd wedi cymryd yr amser i ysgrifennu am risgiau, wedi mynychu ein hyfforddiant, wedi diweddaru risgiau, ac yn bwysicaf oll wedi ysgogi camau gweithredu sy’n gwneud gofal i gleifion yn fwy diogel. Diolch am bopeth rydych chi'n ei wneud."