Uned Asesu Eiddilwch newydd yn agor yn Ysbyty Gwynedd

31 Ionawr 2025

Mae Uned Asesu Eiddilwch newydd wedi agor yn Ysbyty Gwynedd i wella ansawdd gofal a phrofiadau cleifion.

Mae’r uned wedi agor fel rhan o ymdrechion i helpu i leihau’r pwysau ar yr Adran Achosion brys ac i wella’r gofal a ddarperir i’n cleifion oedrannus eiddil er mwyn osgoi derbyniadau i’r ysbyty.

Mae cleifion sy’n dod i’r Adran Achosion Brys yn cael eu sgrinio gan dimau Eiddilwch ymroddedig cyn cael eu trosglwyddo i’r uned am asesiad cynhwysfawr a gofal gan dîm amlddisgyblaethol arbenigol sy’n cynnwys Geriatregwyr, Therapyddion, Fferyllwyr a Nyrsys.

Dywedodd Dr Connor Martin, Meddyg Ymgynghorol ym maes Gofal yr Henoed yn Ysbyty Gwynedd: “Wrth i’r boblogaeth heneiddio, mae ysbytai ar draws y DU yn gweld cynnydd mewn cleifion eiddil ac oedrannus, sydd â risg uwch o ganlyniadau gwael pan gânt eu derbyn i’r ysbyty.

“Mae’r adborth yr ydym wedi’i gael hyd yma, yn ystod yr ychydig wythnosau y mae’r uned wedi bod ar agor, wedi bod yn gadarnhaol iawn. Rydym yn parhau i fod yn y dyddiau cynnar, ond ein nod yw sicrhau bod ein cleifion eiddil yn derbyn gofal prydlon a phriodol. Mae hyn yn golygu y gall rhai cleifion gael eu rhyddhau’r un diwrnod, gan osgoi arosiadau diangen yn yr ysbyty, a lleihau cyfanswm yr amser y maent yn ei dreulio yn yr ysbyty, gwyddom ei fod yn well ar gyfer eu lles a’u hadferiad parhaus.”

Hyd yma, mae’r uned, a ddechreuodd weithredu dim ond tair wythnos yn ôl, wedi cael 52 o dderbyniadau, ac o’r rhain, cafodd 60% eu rhyddhau adref.

Ymwelodd Ysgrifennydd y Cabinet dros Iechyd a Gofal Cymdeithasol, Jeremy Miles AS, â'r uned y mis hwn i gwrdd â'r tîm clinigol ac i glywed am sut yr oedd y gwasanaeth hwn o fudd i gleifion a'r ysbyty.

Dywedodd Mr Miles: “Mae’r uned eiddilwch newydd yn Ysbyty Gwynedd yn nodi cam ymlaen yn y gofal ar gyfer pobl hŷn yng Ngogledd Cymru. Mae’r uned arbenigol hon yn dod â meddygon, nyrsys a gweithwyr proffesiynol perthynol i iechyd ynghyd i ddarparu gofal arbenigol pan fydd ei angen fwyaf, gan ganolbwyntio ar egwyddor gofal brys yr un diwrnod, yn ogystal â helpu i atal cymhlethdodau a lleihau arosiadau ysbyty y gellir eu hosgoi.

“Roeddwn wedi fy rhyfeddu i weld sut mae’r uned yn cefnogi pobl hŷn i gynnal eu hannibyniaeth, a gwyddom y bydd yn arwain at ganlyniadau o ansawdd bywyd gwell, tra hefyd yn lleddfu’r pwysau ar y GIG.”

Ymwelodd Mr Miles hefyd ag Ysbyty Maelor Wrecsam yn ystod ei ymweliad â Gogledd Cymru lle cyfarfu â staff y tu mewn i'r Ystafell Reoli lle clywodd am yr heriau y maent yn eu hwynebu ar hyn o bryd yn ystod misoedd y gaeaf. Clywodd hefyd am y gwelliannau sy’n cael eu gwneud i wella profiadau cleifion a’r broses rhyddhau.