Llunio Dyfodol Ysbyty Llannerch Banna
Trafodwyd dyfodol gwasanaethau cleifion mewnol Ysbyty Cymuned Llannerch Banna yng nghyfarfod y Bwrdd Iechyd ddydd Iau 29 Ionawr, a gwnaed penderfyniad i gynnal ymgynghoriad ffurfiol ynghylch dyfodol y gwasanaethau yn ddiweddarach yn 2026. Yn y cyfamser, mae sgyrsiau â'r gymuned leol i gynorthwyo i ddatblygu atebion hirdymor yn parhau ac anogir pobl i gyfranogi.
Caewyd gwelyau cleifion mewnol yr ysbyty cymunedol ym mis Rhagfyr 2024 ac ers hynny, rydym wedi bod yn cydweithio ag aelodau'r gymuned, staff clinigol ac anghlinigol a phartneriaid i ddatblygu opsiynau posibl at y dyfodol. Nid yw’r rhain wedi’u datblygu’n llawn eto, ac rydym yn gwahodd pawb i barhau i gyfrannu at eu llywio dros yr ychydig wythnosau nesaf. Dyma’r dewisiadau arfaethedig sy'n cael eu hystyried ymhellach:
- Datblygu Hwb Iechyd a Lles Integredig: Byddai hyn yn golygu addasu’r ysbyty i fod yn hwb aml-broffesiynol ble byddai timau iechyd a gofal cymdeithasol a rhai o’r sector gwirfoddol efallai yn cydleoli. Y nod yw gwella mynediad at wasanaethau cleifion allanol ac ataliol yn nes at gartrefi cleifion; lleihau teithio a chreu canolbwynt ar gyfer gofal yn Llannerch Banna.
- Datblygu Hwb Iechyd a Lles yn cael ei lywio gan y Trydydd Sector: Byddai hyn yn ceisio cyfuno model yr hwb integredig â rôl arwain a chyflawni benodol ar gyfer partneriaid yn y trydydd sector. Mae'r cynnig yn adeiladu ar sail cryfderau presennol yn y sector gwirfoddol lleol i allu cynnig cymorth iechyd a lles a chymorth cymdeithasol ynghyd â gwasanaethau sy’n cael eu llywio gan y GIG.
- Gwella gwasanaethau cymunedol heb adeilad yr ysbyty: Byddai hynny’n golygu ailgyfeirio adnoddau i’w buddsoddi mewn gwasanaethau allgymorth a gwasanaethau yn y cartref yn lle cynnal safle parhaol. Mae'r model hwn yn blaenoriaethu hyblygrwydd a dull “gofal yn nes at gartrefi cleifion”.
Mae’r farn gyffredin hyd yn hyn yn nodi na fyddai adfer gwelyau cleifion mewnol tebyg i'r model blaenorol yn mynd i'r afael ag anghenion y gymuned, ac un o themâu allweddol yr adborth gan y gymuned oedd cadw adnoddau a’u haddasu at ddibenion gwahanol er mwyn gallu diwallu anghenion iechyd y boblogaeth leol yn well.
Rydym yn ystyried manteision ac anfanteision pob cynnig i'n helpu i fireinio ein meddylfryd, ac yn ogystal â sgyrsiau a chyfarfodydd wyneb yn wyneb, rydym yn annog pobl i rannu eu barn yma: Llunio Dyfodol Ysbyty Cymuned Llannerch Banna
Bydd opsiynau a ddatblygir yn fanylach yn cael eu cyflwyno i'r Bwrdd Iechyd i'w cymeradwyo cyn ceisio adborth manylach yn y cyfnod ymgynghori yn ddiweddarach yn ystod y flwyddyn. Bydd hyn hefyd yn cynnwys croesawu dewisiadau eraill cadarn, sy'n seiliedig ar dystiolaeth, i'n helpu i sicrhau y bydd unrhyw wasanaethau y byddwn yn eu cynnig yn briodol i’r boblogaeth, nawr ac yn y dyfodol.
Yn dilyn adborth yn sgil camau cychwynnol y gwaith ymgysylltu, rydym hefyd yn llunio rhestr o grwpiau a mannau cyfarfod yn y gymuned leol ble gellir hysbysebu cyfleoedd i gyfranogi neu fynychu cyfarfodydd wyneb yn wyneb. Os gwyddoch am grŵp neu leoliad a allai fod yn ddefnyddiol, rhowch wybod i ni: BCU.Planning@wales.nhs.uk
Cwblhewch yr arolwg - Llunio Dyfodol Ysbyty Cymuned Llannerch Banna