Neidio i'r prif gynnwy

Taliadau Uniongyrchol i Bobl sy'n Derbyn Gofal Iechyd Parhaus (GIP) wedi'i Ariannu'n Llawn

Mwy o ddewis, rhyddid a rheolaeth ynghylch eich gofal

Mae newid yn y ddeddfwriaeth a ddaeth i rym ar 1 Ebrill 2026, bellach yn caniatáu i bobl sy'n gymwys ar gyfer Gofal Iechyd Parhaus y GIG (GIP) dderbyn eu gofal trwy Daliadau Uniongyrchol. Mae hyn yn golygu y gall unigolion cymwys dderbyn cyllid yn uniongyrchol i drefnu a rheoli eu gofal eu hunain, yn hytrach na derbyn gwasanaethau a gomisiynir gan y GIG.

Beth yw Taliadau Uniongyrchol?

Mae Taliadau Uniongyrchol yn fath o gyllideb bersonol. Rhoddir cyllid yn uniongyrchol i unigolion cymwys fel y gallant ddewis a thalu am eu gwasanaethau gofal a chymorth eu hunain, yn hytrach na bod y bwrdd iechyd yn trefnu gwasanaethau ar eu rhan. 

Pwy sy'n Gymwys?

  • Pobl sydd wedi cael eu hasesu fel rhai cymwys ar gyfer Gofal Iechyd Parhaus y GIG yn unig y gellir eu hystyried ar gyfer Taliadau Uniongyrchol.
  • Ar y dechrau, bydd hyn yn berthnasol i oedolion 18+ oed sy'n cael gofal yn y gymuned, gan gynnwys pobl sy'n cael eu cefnogi gan wasanaethau Iechyd Meddwl ac Anabledd Dysgu.
  • Nid yw unigolion sy'n byw mewn cartrefi gofal wedi'u cynnwys ar hyn o bryd.

Pa Ofal y Gellir ei Ariannu?

Bydd y math o ofal a ariennir yn seiliedig ar anghenion iechyd sydd wedi cael eu hasesu a'u hamlinellu yng nghynllun gofal yr unigolyn. 

  • Bydd pob cynnig yn destun asesiad risg llawn.
  • Bydd cyllid yn cael ei gymeradwyo ar gyfer cynorthwywyr personol sy'n bodloni gofynion cofrestru proffesiynol a gwiriadau hawl i weithio yn unig.
  • Bydd monitro ariannol a pherfformiad cryf ar waith.
  • Bydd adolygiadau rheolaidd yn sicrhau bod gofal yn parhau i fod yn ddiogel, yn effeithiol, ac yn ymatebol i anghenion sy'n newid.

Camau Nesaf

Mae Tîm GIP yn gweithio'n gyflym i ddatblygu proses dros dro. Gan fod hon yn ffordd newydd o ddarparu GIP, mae strwythurau a mesurau diogelwch newydd yn cael eu rhoi ar waith i sicrhau bod y system yn ddiogel, yn gynaliadwy, a bod cynorthwywyr personol wedi'u hyfforddi a'u gwirio'n briodol. 

Os ydych chi'n cael GIP ar hyn o bryd ac yn credu y gallai Taliadau Uniongyrchol fod yn addas i chi, cysylltwch ag:

  • Eich cydlynydd gofal yn eich tîm amlddisgyblaethol (MDT), a/neu
  • Eich tîm GIP lleol .

Mae manylion cyswllt lleol ar wefan gyhoeddus GIP BIPBC:

Gofal Iechyd Parhaus y GIG - Bwrdd Iechyd Prifysgol Betsi Cadwaladr