Sut i amddiffyn eich hun rhag hypothermia
Mae'r oerni yn cynyddu'r risg o hypothermia, yn enwedig ymysg yr henoed, yn ogystal â chynyddu'r risg o anaf fel cwympo trwy lithro ar y rhew.
Dyma gyflwr lle mae'r corff yn mynd yn beryglus o oer. Gall bod mewn amodau oer iawn am gyfnod byr ei achosi, neu fod braidd yn oer am gyfnod maith. Crynu a theimlo'n simsan yw rhai o'r symptomau buan. Mae symptomau hypothermia difrifol yn cynnwys trafferth anadlu a phwls gwan. Mae hypothermia difrifol yn bygwth bywyd ac mae angen ei drin fel achos meddygol brys.
Sut i'ch amddiffyn eich hun rhag hypothermia
- Gwisgwch sawl haen denau o ddillad i ddal gwres y corff yn hytrach nag un haen drwchus
- Cadwch yn gynnes yn y gwely, efallai drwy wisgo sanau gwely a rhywbeth am eich pen yn ogystal a phyjamas neu goban gynnes
- Cofiwch wisgo het i fynd allan - mae llawer o wres y corff yn cael ei golli o'r pen
- Bwytewch yn dda a chael o leiaf un pryd poeth y dydd
- Yfwch ddiodydd poeth drwy gydol y dydd
- Cynheswch eich cartref yn ddigonol a chymerwch gamau i leihau drafftiau a chadw'r gwres yn eich cartref
Mae rhagor o gyngor a gwybodaeth ynghylch cadw'n gynnes ac yn iach y gaeaf hwn ar gael ar wefan Age Cymru.