Awgrymiadau da ar gyfer bwydo ar y fron cynnar

✔ Bydd babi sy’n cydio’n dda yn gallu bwydo'n effeithiol

✔ Gofynnwch am gymorth os nad ydych yn siŵr a yw'ch babi wedi cydio’n dda

✔ Anelwch at fwydo eich babi ar y fron tua 8 i 12 gwaith mewn 24 awr

✔ Y ffordd orau o atal bronnau anghyfforddus llawn ar ddiwrnod 3 i 5 yw i fwydo ar y fron yn aml.

Lleoli eich babi ar gyfer bwydo ar y fron

Mae mamau a babanod yn dysgu bwydo ar y fron gyda'i gilydd. Gall cael y lleoli a'r cydio yn gywir gymryd ychydig o amser - gofynnwch am gymorth os nad ydych yn siŵr.

Daliwch eich babi yn wir agos at eich corff, dylai brest eich babi swatio’n agos at eich bron. Sicrhewch fod pen a chorff y babi yn eich wynebu chi
Symudwch y babi fel bod ei drwyn gyferbyn â'ch teth
Dewch â gên y babi yn agos i'ch bron - y pen wedi gogwyddo’n ôl erbyn hyn
Yn awr, dylai eich teth fod yn pwyntio at drwyn eich babi. Arhoswch i'ch babi agor ei geg yn llydan. Dewch â'ch babi at y fron.

Os yw eich babi wedi cydio’n dda, dylai bwydo ar y fron fod yn gyfforddus. Os yw bwydo yn boenus - gofynnwch am gymorth cyn gynted â phosib gan fydwraig, ymwelydd iechyd neu Gyfaill Cefnogol hyfforddedig.

Cadw eich bronnau yn gyfforddus pan fo’ch llaeth yn cynyddu

Mae'r mesurau hyn yn arbennig o ddefnyddiol cyn bwydo ar y fron, ac mae hi'n haws i fabi gydio mewn bron feddal.

Mae cynhesrwydd yn ysgogi llif llaeth a bydd yn helpu i feddalu’r fron, rhowch wlanen gynnes neu cymerwch fath neu gawod gynnes
Tylinwch eich bronnau i feddalu a hyrwyddo llif y llaeth
Gwasgwch y llaeth allan â llaw i feddalu'r deth a'r areola. Gwyliwch y fideo defnyddiol hwn gan Unicef ar wasgu llaeth allan â llaw am ragor o wybodaeth
Defnyddiwch bwmp bron yn ysgafn i feddalu'r fron ond gwnewch yn siŵr eich bod yn paratoi'r fron gyda chynhesrwydd a thylinwch cyn ei defnyddio
Rhowch gywasgiad oer e.e. gwlanenni oer (cadwch nhw'n barod mewn bag plastig yn yr oergell)
Gwnewch yn siŵr bod eich bra yn ffitio'n gyfforddus ac osgowch wisgo bras â weiren oddi tanynt hyd nes bod eich bronnau wedi setlo i lawr
Gall cymryd lladdwr poen neu feddyginiaeth wrthlidiol i helpu i leihau anghysur

Mae llawnder bron cynnar yn cael ei ddatrys yn gyflym fel arfer gyda'r dulliau syml a amlinellwyd uchod. Os yw'r boen a'r chwyddo yn parhau neu rydych yn teimlo'n anhwylus gyda symptomau tebyg i ffliw neu wres uchel, siaradwch â'ch Bydwraig, Ymwelydd Iechyd neu Feddyg.

Pa mor dda y mae eich babi yn bwydo ar y fron?

A yw’ch babi wedi cael 8 ffîd neu fwy mewn 24 awr?
A yw’ch babi yn bwydo rhwng 5 a 40 munud ar bob ffîd?
A yw’ch babi yn gyffredinol dawel ac ymlacedig tra'n bwydo ac yn ymddangos yn fodlon wedi'r rhan fwyaf o ffîdiau?
Pan mae eich babi dros 3 diwrnod oed, a allwch chi glywed y babi yn llyncu yn aml yn ystod ffîdiau?
A yw’ch babi yn cael 6 neu fwy o glytiau gwlyb y dydd (ar ôl y 5 niwrnod cyntaf)?
A yw’ch babi yn cynhyrchu o leiaf 2 faw lliw melyn sy'n fwy na maint darn £2 (ar ôl y 5 niwrnod cyntaf)?
A yw’ch babi yn ôl i'w bwysau ar enedigaeth erbyn 14 diwrnod?

Os ‘na’ yw’r ateb i unrhyw rai o'r cwestiynau hyn, siaradwch â'ch Bydwraig neu Ymwelydd Iechyd.

Bwydo ar y fron a rhannu gwely

Mae llawer o famau yn gweld bod bwydo eu babi tra'n gorwedd i lawr yn y gwely yn eu helpu i ymdopi â bwydo yn y nos ac yn eu helpu i gael mwy o seibiant ond rhaid gwneud hyn yn ddiogel. Gellir cael gwybodaeth bellach yn llyfryn Unicef ar ofalu am eich babi yn y nos ac wrth gysgu.

Awgrymiadau da ar gyfer pob cyntun, nid yn unig ar gyfer y nos:

Trafodwch fwydo yn ystod y nos - gofynnwch i'ch Bydwraig neu Ymwelydd Iechyd ddangos i chi sut i leoli eich hun a'ch babi yn ddiogel ar gyfer bwydo ar y fron tra'n gorwedd i lawr yn y gwely
Ni ddylai eich babi fod rhwng dau oedolyn wrth fwydo yn y gwely
Peidiwch fyth â lapio neu rwymo eich babi - mae angen i’ch babi ddefnyddio ei freichiau a'i goesau i gyfathrebu â chi tra yn y gwely
Peidiwch fyth â rhoi eich babi mewn sach gysgu wrth fwydo
Lleolwch got eich babi yn agos i'ch gwely i wneud trosglwyddo’r babi yn rhwyddach
Rhowch eich babi i orwedd ar gynfas cot wrth fwydo a defnyddiwch hyn i helpu trosglwyddo’r babi i'r cot